Gipasanginlan sila nga corrupt

Duha ka iladong tawo dinhi sa Sugbo, gipasanginlan nga nakahimo og graft and corruption. Sila mao si Cebu City Councilor Prisca Niña Mabatid ug si Regional Director Victor Caindec sa Land Transportation Office.

Si Mabatid kay gikiha sa kanhi niya kawani sa opisina sa City Hall kay nalambigit kuno pagnegosyo og mga karne nga gibaligya sa kabarangayan ug gigamit ang iyang mga empleyado.

Matud ni Roldan de los Reyes nga kay wa man siya mitabang sa negosyo ni Konsehal Mabatid, gitaktak siya sa iyang trabaho. Pero nganong karon ra man mireklamo si De Los Reyes, abi kay gitaktak na siya?

Mora man gud og masabot nga kon wa pa siya taktaka sa trabaho ni Konsehal Mabatid, dili diay unta siya moreklamo kon tinuod man ang iyang giingon nga nakahimo og kalapasan sa balaod ang konsehal?

Gi-chat nako si De Los Reyes ug gipangutana kon nganong karon ra man siya mireklamo human siya gitaktak sa trabaho? Matud niya nga wa kuno’y opisina ang Ombudsman atol sa ECQ.

Aw, buyno, awhagon nato si De Los Reyes nga kinahanglang pamatud-an gyud niya kining iyang pasangil, ug dili gyud siya moatras sa kaso, kay mobawos ra ba pagpasaka og kaso si Mabatid niya.

Kon moatras gani si De Los Reyes, makaingon gyud ko nga malisyoso ug igo ra siyang nagbutangbutang kang Mabatid. Kinahanglang hugot gyud ang imong bakus bai.

* * *

Unya, si Director Caindec sab gipasanginlan sa tigpamaba ni Presidente Duterte nga si Harry Roque nga giingong nalambigit og kaso nga nagpadato sa iyang kaugalingon gamit ang iyang posisyon.

Buyno, kon tinuod man gani ang report nga nadawat ni Roque, angay niya kini nga pamatud-an kay bug-at kaayo kining mao nga pasangil ug makadaot kini sa dungog ni Caindec.

Matud ni Caindec nga si Roque kanhi associate lawyer sa mga abogado sa dakong car dealer nga naapike tungod sa iyang estrikto nga pagdumala sa LTO dinhi sa rehiyon.

Gusto ko nga maimbestigar kining maong mga pasangil kay aron molutaw gyud ang tinuod. Gibalikbalik ni Caincdec nga daghang car dealers, ingon man ang mga tigbaligya’g motor, nga nangasuko niya.

Kini tungod kay matud ni Caindec “nabonggo” niya ang ilang binuang nga nakapaalkanse sa gobiyerno og minilyon ka pesos kay wa sila modeklarar sa tinuod nila nga halin sa mga sakyanan.

Ang mga sakyanan, apil ang motor, nga gipalit pinaagi sa “installment” angay gyud unta nga i-report ni sa Registry of Deeds ug ang iyang rehistro tatakan og pulong “INCUMBERED.”

Apan wa ni himoa sa daghang mga car ug motorcycle dealers kay aron dili sila makabayad og dakong buhis sa gobiyerno.