Walay paglugak

Bisan pa sa pagkuyanap sa makamatay nga coronavirus disease kon COVID-19 dinhi sa Sugbo, padayon gihapon kining mga nalambigit sa ginadiling druga sa ilang negosyo. Nagtuo man gud sila nga ilang malutsan ang otoridad karong pahona.

Sa niaging mga adlaw, mokabat sa P46 milyones nga balor sa shabu ang nasakmit sa mga sakop  sa Cebu City Police Office ug Regional Intelligence Unit atol sa dakong operasyon didto sa Barangay Guadalupe.

Tulo ka suspetsado ang nasikop sa kapolisan atol sa maong operasyon. Matud pa ni Police Colonel Josefino Ligan, ang direktor sa CCPO, mga sakop sa Rustico Ygot drug group ang naarestong mga suspetsado.

"Mao ni kunbaga iyang mga soldiers on the ground. Maoy mo-move sa iyang mga (items) kung asa ipadala or i-distribute through provinces sa Negros, Cebu, Cebu City and Bohol," matud pa ni Ligan sumala pa sa napatik sa The FREEMAN.

Kining maong kalamboan tipik lamang sa mga sunodsunod nga kalamposan nga nakab-ot sa kapolisan ug Philippine Drug Enforcement Agency batok sa negosyo sa illegal nga druga sa nakalabay nga mga semana.

Gani, pipila sa mga nadakpan naglangkob man sa kababayen-an kinsa misangpot na lamang sa pagpamaligya og ilegal nga druga tungod lagi kay nawad-an og trabaho gumikan sa pandemiya sa COVID-19.

Niining ilang kalamposan, angay lamang nga pasidunggan ang kapolisan, PDEA ug uban pa gumikan sa walay hunong nila nga kampanya batok sa negosyo sa illegal nga druga dinhi sa dakbayan sa Sugbo ug lalawigan.

Kini bisa pa man sa ilang dakong trabaho pagpatunhay sa community quarantine ug ubang mga health protocol aron pagpugong sa pagkuyanap sa COVID-19 nga miigo na sa liboan ug mipatay sa gatusan dinhi sa Sugbo.

Siguro mi-take advantaged kining mga sindikato sa druga sa ka-busy sa otoridad sa kampanya batok coronavirus disease. Basin nagtuo ang mga drug dealer ug pusher nga milugak ang otoridad sa krusada batok druga tungod sa COVID-19.

Apan, sa atong nakita, wala gayud milurang ang kapolisan sa ilang kampanya batok sa negosyo sa ilegal nga druga. Gani ang ilang kalamposan sa nangaging mga adlaw magsilbi usab nga warning alang niadtong mga nalambigit niining maong klase sa negosyo nga maihap na ang ilang adlaw.