Ang balor sa kinabuhi

Duha ka sakop sa nabantog nga pamilyang Garcia ang namatay. Ang namatay mao sila si kanhi Dumanjug Mayor Nelson Garcia ug Barili Mayor Marlon Garcia. Ang duha nalandig sa tambalanan tungod kay natakboyan sa Coronavirus Disease o COVID-19. Apan ang duha pulos na naayo sa mananakod nga sakit. Giklaro sa pamilyang Garcia ug sa mga doktor nga nag-atiman kanila basi sa medical record nga lain ang ilang namatyan ug dili COVID-19.

Ang pamilyang Garcia migasto og minilyon aron lang maluwas ang kinabuhi sa duha ka sakop sa pamilya.

Kun wala ko masayop sobra sa lima ka milyon ang nagasto sa pamilya ni kanhi Dumanjug Mayor Nelson Garcia ug sobra usab sa tulo ka milyon ang nagasto sa pamilya ni Barili Mayor Marlon Garcia.

Sa miaging semana sila si Governor Gwendolyn Garcia ug Third District Representative Pablo Jhon Garcia mipahibalo sa publiko nga mangotana sila sa mga hanas sa medisina tungod sa gidangatan sa pagkamatay sa duha nila ka igsoon.

Nagtuo ang gobernador ug kongresista nga adunay  nahimong kasaypanan ang Chung Hua Hospital ug ang duha ka mga doktor nga nag atiman sa ilang igsoon.

Gitug-an sa gobernador ug kongresista nga gusto na unta nga mogawas sa tambalanan si Marlon tungod kay naayo na apan wala kini pagawasa sa mga doktor hangtod nga nabalikan na hinuon kini sa iyang sakit ug migrabi pa. Samtang si Nelson pagsulod sa tambalanan wala kuno patumara sa tambal nga maoy nakapaayo sa Kongresista sa dihang natakdan pod kini sa COVID-19.

Ang pamilyang Garcia nagtuo nga natakdan sa COVID-19 sila si Nelson ug Marlon tungod sa paghimo sa ilang mga katungdanan isip opisyal.

Ang kantidad nga nagasto sa mga Garcia dili basta-basta. Kun imong sumadahon sobra sa walo ka milyon. Apan kining maong kantidad wala baliha sa pamilyang Garcia maluwas lang ang kinabuhi sa duha ka igsoon. Mao ni ang balor sa kinabuhi sa managsoon.