Mabatid gikiha

Gikiha diay si Cebu City Councilor Prisca Niña Mabatid sa iyang kanhi empleyado ug gipasanginlan nga nakahimo og mga kalapasan sa mga lagda sa Government’s Anti-Graft and Corrupt Practices Act.

Matud pa ni Roldan De Los Reyes nga gigamit ni Konsehal Mabatid ang iyang inpluwensya isip opisyal sa local nga kagamhanan ug gimandoan ang iyang mga staff nga motrabaho sa lainlaing “side business.”

Sa iyang 11 ka pahina nga reklamo didto sa Ombudsman-Visayas nga gipasaka kagahapon, matud ni De Los Reyes nga si Konsehal Mabatid nalambigit sa pagpamaligya og inihaw nga manok, butane canisters, face shields ug uban pa.

Namasangil si De Los nga giingnan ni Mabatid ang iyang mga empleyado nga kon dili motuman sa iyang mando, dili niya ipa-release ang ilang mga sweldo.

Apan si Mabatid nga nahinabi sa media, nanghimakak sa pasangil batok kaniya kay kuno ang mga inihaw nga manok, gipanghatag ra niya ug wa niya ipamaligya.

“I was not selling dressed chicken. I was, in fact, donating them to beneficiaries so they could start their own livelihood.

These are just malicious intent because I fired him,” matud sa konsehal.

Si De Los Reyes miingon nga gitaktak siya sa trabaho ni Mabatid kay wa man siya motuman sa iyang mando, ug giangkon sab kini ni Mabatid nga dunay mga programa sa iyang opisina nga dili “cooperative” si De Los Reyes.

Buyno, kay anaa na man kini sa Ombudsman, magpaabot na lang kita kon unsay hukom sa mga anti-graft investigator.

Pero para nako, nindot unta kadto kon si De Los Reyes mipasaka pa og kaso diha nga siya wa pa taktaka sa trabaho.

Kay ang pagpasaka og kaso ni De Los Reyes gihimo man dihang gitaktak na siya sa trabaho, mogaan ang gibug-aton nga gusto niya ang limpyo nga pangagamhanan, kon tinuod man ang iyang giingon nga si Mabatid, nakahimo og kalapasan sa balaod.

Maisip pa gani kini nga panimalos lang niya sa konsehal tungod sa pagtaktak kaniya sa trabaho. Mosamot pa gyud kon sa umaabot nga mga adlaw, moatras si De Los Reyes sa iyang gipasaka nga kaso.

Kon tinuod man nga gibutangbutangan ra og pasangil nga way basehanan si Mabatid, angay niyang konsultahon ang iyang mga abogado ug mopasaka siya og bawos nga kaso batok ni De Los Reyes.

Apan, kinsa man pud ang giingon ni Mabatid nga “beneficiary” nga iyang gitabangan aron makabaton og negosyo?

Kinahanglan nga si De Los Reyes mohatag gyud og mga ebidensta aron mopalig-on sa iyang gipasaka nga kaso batok sa konsehal.