Pailob ug pagkamanggihatagon

SEPTIYEMBRE 20, 2020: Ikawhaa'g-Lima

 nga Domingo sulod sa tuig

Mga Pagbasa: Is. 55;6-9/Sal. 145/

Fil. 1;20c-24;27a/Mt. 20;1-16a

Sa ancient Mediteranean culture, dili lang kay butang o salapi ang maisip nga bahandi. Bisan gani ang dungog nga mahatag sa matag tawo nganha kanimo kini pagaisipon man nga bahandianon.

Mao tingali ni ang hinungdan kun nganong ang tag-iya sa parasan ang andam ug tagana gihapon sa paghatag sa iyang kaayo ug suholan nga patas bisan pa man kun nagtrabaho sila sa nagkalain laing mga oras gikan sa buntag hangtud na sa hapon. Silang tanan managsamang nakadawat lamang og parehong suholan. Ang uban nagbagulbol ning maong pamaagi apan gitataw sa tag-iya nga siya mismo ang dunay dakong katungod kun unsaon paggamit ang iyang salapi o nasina lang ba gyud kini kay siya manggihatagon man?

Alang natong mga tawo kusog kaayo kitang mangwenta kun unsay maabot. Husto man pud nga mohatag ta sa hustong suhol tungod sa hustong buhat. Apan lahi ang Dios. Ang Dios manggihatagon ra gyud kaayo nga tungod niini iyang gisama nga mo enjoy sa managsamang init sa adlaw ang mga matarong ingon man ang mga makasasala.

Labaw na nga dilli buot ang Dios sa kamatayon sa usa ka tawong makasasala. Buot niya nga ang tanan mahatagan og igong kahigayonan nga magbag-o ug mag-usab segun sa lihok sa grasaya sa Dios diha sa ilang tagsa tagsa ka mga kinabuhi. Ning  maong paagiha nahimong mas makahuloganon ang tanang mga balaod kun ato kining sabton diha sa konteksto sa grasya ug sa gugma.

Kay kun wala ang gugmang Diosnon daw malisod alang kanato ang pagsabot sa pulong kalooy kun wala ang konkretong sanglitan sa pagkamaloloy-on, ug ang tinubdan ning maong kalooy nga dili hitupngan mao ang Dios mismo nga girepresent sa agawon nga maoy tag-iya sa parasan.

Ang pagpailob mahinungdanon kay kun wala ang pagpailob nan, malisod alang kanato ang pagsinati sa pasaylo gikan sa Dios. To err is human and to forgive is divine! Apan ang mahinungdanon mao nga Love is patient and Kind!