Taas nga pailob

Kaning bag-ong sistema sa pagtungha sa mga bata nga gitawag og distance learning dili mosalir kun walay kooperasyon sa mga ginikanan, dako sila og papel sa pagtuon sa ilang mga anak ilabi na nga sila maoy makauban sa mga bata sa matag adlaw.

Ang DepEd naghimo na og mga programa kun unsaon nila kini paghimo, dunay ipaagi sa modules, duna say pinaagi sa telebisyon. Anhi nila ipaagi ang ilang mga leksyon nga tun-an sa mga bata diha sa ilang balay.

Apan tungod kay wala may presensya sa magtutudlo, ang mga ginikanan maoy moako sa maong papel. Pinaagi sab niini, matutokan nila ug makita nila personal ang paglambo sa kahibalo sa ilang mga anak.

Subo lang kay malisud kini para niadtong mga ginikanan nga parehong nagtrabaho unya gagmay pa ilang mga anak nga tinun-an.

Karong Oktubre 4 magsugod ang klase sa mga bata ug usa sa plano sa DepEd mao ang sinimanang paggamit sa telebisyon isip usa sa pamaagi sa distance learning.

Samtang daghang pamilyang Pilipino ang dunay telebisyon sa balay, dunay pipila bisan nagpuyo sa urban areas ang wala niini, usa unya sila sa kinahanglang hatagan og pagtagad sa mga magtutudlo.

Importante ang pagtuon sa mga kabataan karon tuiga tungod kay matud pa sa World Bank ang matag bata nga dili makapadayon sa pagtungha, kawad-on kini sa gobiyerno sa nasud diin sila nagpuyo.

Mas labing makaluluoy unya ang kaugmaon sa mga batang kabus kun mahikawan sila sa tukmang edukasyon. Kabus na gani ilang ginikanan, inig dagko nila kabus lang gihapon tungod kay way nahuman.

Kinahanglan sab sabton sa mga ginikanan kung dunay mga sayop sa mga learning materials ug ilaha kining responsibilidad nga mopasabot niini sa ilang mga anak.

Kay kun sila mismo dili mosalig sa maong bag-ong sistema tungod kay gusto sila’g perpekto, aw sila ra say naghatag og sayop nga impresyon sa ilang mga anak. Ini og sugod aning distance learning, angay patas-an gyud sa mga ginikanan ang pailob sa sistema tungod kay walay makaperpekto sa unang pagsuway.