EDITORYAL - Taga Cebu City nakatakod?

Off-limits lang una para sa mga lokal nga turistang taga Cebu City ang tanang mga tourist destinations sa probinsya sa Sugbo subay sa mando ni Gob. Gwendolyn Garcia nunot sa pagsaka sa mga kaso sa novel coronavirus disease sa kalungsoran.

Ang Cebu City ug ang probinsy sa Sugbo pareho nang ubos sa general community quarantine. Ubos sa maong kwarantina gidili pa gihapon sa mga tawo ang paggawas-gawas sa panimalay kun ang tuyo  pagsuroy-suroy lang. Ang gitugotan mao lamang ang biyahe sa mga essential goods, mga trabahante sa Cebu City nga magulian sa probinsya, abli na sab ang pipila ka mga establisamento.

Ang lalawigan, pinaagi mismo ni Garcia sa miaging buwan mibukas pagbalik sa mga tourists destinations sa probinsya sa tuyo nga buhion pagbalik ang ekonomiya sa lalawigan nga kapin lima ka buwan ng niungot.

Apan ning mga nanglabay nga mga adlaw, samtang nagkagamay ang kaso sa COVID-19 sa Cebu City, nabantayan sab ang pagsaka sa mga kaso diha sa mga kalungsoran.

Ang gobernador namahayag nga kining mga nangatakdan sa kalungsoran posibleng natakdan sa taga Cebu City. Tingali dunay mga impormasyon ang gobernador nga diin na-trace gyud nga taga Cebu City ang nakatakod sa mga napositibo. Apan duna nay leksyon ang probinsya sa miaging Hunyo dihang nag GCQ ang Cebu City ug giablihan ang mga utlanan padung sa probinsya, misaka sab ang mga kaso didto.

Responsibilidad ni Garcia ang kaluwasan sa iyang mga konstituwente ug mahimo niyang gamiton ang iyang gahum aron mapanalipdan ang iyang lalawigan.

Hinuon kung buot gyud hunahunaon, wa paman gyud untay mga taga Cebu City nga gitugotang makabiyahe padung sa mga tourist destinations sa probinsya tungod kay ubos sa MGCQ sa siyudad, wala may dakong kalainan sa executive order ni Mayor Edgardo Labella sa GCQ pa kini sa miaging buwan.

Maayo sab tingali susihon kining mga nanarbaho sa Cebu City nga magulian sa ilang mga lungsod kay sila'y kada adlaw magtabok-tabok.