Nagpakabuta lamang

Daghan ang nakasabot sa nagkadakong protesta didto sa kaulohan kalabot sa padayong rehabilitasyon ug pagpaanindot sa Manila Bay nga gipatuman sa Department of Environment and Natural Resources.

Matud pa sa mga sektor nga mikontra niining maong proyekto, usik lamang kini sa salapi sa katawhan niining panahon nga nagkinahanglan ang nasyonal nga kagamhanan og dakong pondo batok sa COVID-19 pandemic.

Apan ang wala hisabti sa mga miprotesta sa rehabilitasyon sa Manila Bay mao ang dakong panginahanglan sa pagbalik pag-usab sa kinabuhi sa maong bay, nga sulod sa pipila na ka dekada, nahimo nang biologically dead.

Sigun usab sa pamahayag sa kagamhanan, 2019 pa nagsugod ang rehabilitasyon sa Manila Bay. Sa laktod, sa wala pa kini magsugod, aduna nay milyones ka pesos nga pondo nga naka-allocate niini ang national government.

Apan taliwala niining coronavirus pandemic nga mihasi pag-ayo sa nasud, miisa ang kilay sa uban, ilabina niadtong mga kritiko sa administrasyon, kay nganong kuno nga gi-prioritized pa ang rehabilitasyon sa Manila Bay.

Hinuon, ila usab kana nga katungod. Kini tungod kay ania kita sa demokratikanhong pangagamhanan. Ilang nakita nga sayop ang pagpatuman sa maong proyekto. Ilang nakita nga pag-usik-usik lamang kini sa salapi sa panudlanan sa kagamhanan.

Apan, sa laing bahin, makapangutana usab kita kun dili ba kaha kining mga protesta sa rehabilitasyon sa Manila Bay mugna lamang sa politikanhong kaikag sa kampanya batok sa administrasyon ni Presidente Duterte. Alang sa kagamhanan, klarong ang oposisyon ang nagpasiugda niini.

Butang nga dili masabtan mao ang realidad nga nagpahipi sa sitwasyon sa Manila Bay. Sa wala pa gipatuman ang rehabilitasyon niini, wala gyuy nakaako pagprotesta batok sa nagbuntaog nga toneladang basura sa kabaybahonan niini ug nag-awhag sa nangaging mga administrasyon paghinlo niini.

Apan sa dihang gi-rehab ug gipaanindot na kini ilalum sa administrasyon ni Duterte, tulin pa sa alas kwatro nga nakasiyaok kining mga nagprotesta batok sa maong proyekto ug miakusar sa kagamhanan og pag-usik-usik lamang sa pondo.

Bisan pa taliwala niining mga protesta, dili malalis nga dako og ikatabang ang rehabilitasyon sa Manila Bay sa paningkamot pagpabalik sa natural nga kaanindot niini. Usa kini ka butang nga gipakabuta lamang niadtong mga nagprotesta.