Bagyo molurang pero mobalik
JAV BANATI - Javier Yntig Tapulado (Banat) - September 14, 2020 - 12:00am

May pipila ka magsusulat, kinsa mipakasama sa COVID-19 nga usa ka dakong bagyo nga mihasmag sa tibuok kalibotan.

Daghang kinabuhi ang gipaantos, gipahapla ug nangamatay.

Apan matud nila, tawo, ayaw kabalaka. Kay bisan unsa kakusog-pintas ang bagyo, molurang ra kini ug mopuli ang bulawanong kahayag sa bag-ong banagbanag. Nga sa ato pa, taliwala niini COVID-19 pandemic crisis, nga lapas na sa tunga sa tuig ang pagpangmangtas, moabot ra gayod ang panahon nga kini hingpit nang mahunong.

Gani, gikan sa enhanced community quarantine, anaa na man kita karon sa modified general community quarantine, timaan nga mikalma na ang pagtinakdanay ug hapit na mahanaw.

Pero, dili ko konporme sa ilang pamahayag. Sa tinuoray lang, base sa atong makita karon sa kadalanan ug sa ubang dapit, mibalik na sab ang kagahig ulo sa mga badlongon, kinsa wala na giseryoso ang pagsunod sa kinatibuk-ang health protocols nga kanunay’ng gimando sa kagamhanan nga tumanon gayod sa tanang panahon.

Naa nay magtapoktapok, mag-istoryahanay nga walay facemask gisul-ob.

Usab, may mga tindahan nga ang mga mamalitay, magdinul-itay na. Maghinunghongay pa! Ay, pastilan!

Maputol kaha ang kutay sa pagtinakdanay sa COVID-19 kon kining sitwasyona magpadayon? Miminus ang report sa mga nangadakpan? Natural! Kay midiyotay na baya ang mga mananakop.

Kadaghanan sa mga estriktong polis atua miuli na sa kaulohan. Hinungdan, nga dili na maato sa mga otoridad nga nahabilin ang pagpanakop.

Ang kinaugalingong disiplina sa matag usa kanato, pinaagi sa relihiyosong pagsunod sa balaod, mao ray makasulbad ning dakong gumonhap nga atong giatubang.

Angay hinuktokan. Base sa rekord sa DOH, Central Visayas, ang Cebu City mitala og 19 ka bag-ong COVID-19 cases niadtong adlaw lang sa Septembre 11.

Ug kon dili mapugngan ang pagpabadlong sa mga badlongon, pagahilantawan nga basig mosirit na sab sama sa kuwitis, ang pagsulbong sa pagtinakdanay ning umaabot nga mga adlaw.

Kay imbes ang COVID-19 ray giilang bagyo nga nagkahinay na unta, gisuportahan man hinuon sa mga badlongon, kang kansang kinaiya mas gahi pa patyon kay sa coronavirus.

Hinungdan, nga inay molurang na unta ang kamangtas sa COVID-19, mobalik ra gihapon kini tungod sa kagahig ulo sa atong kaigsoonan.

Unta, pahumokon na sa Ginoo ang ilang kasingkasing.

COVID-19
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with