Diplomasya sa bakuna
Bisan wa pay klaro kanus-a makamugna og bakuna batok sa COVID-19, nalukop na og pasalig ang kadagkoan sa China sa nagkalainlaing kanasuran sa kalibotan nga apil sila sa labing unang makadawat og mga bakuna ug nga di sila pasagdang maiwit sa kalibotanong kampanya batok sa pandemya.
Nagpatuyang lang ang China sa pagpasalig sa Pilipinas, Indonesia ug ubang kanasuran nga silay labing unang makakuha sa mga bakuna, ang mga nasud sa Latin America ug Carribean pautangon og $1 bilyon aron makapalit sa mga bakuna ug ang Bangladesh librehon og mga bakuna.
* * *
Abunda ang sukaranan si Chinese President Xi Jinping nga magpahumot sa ubang kanasuran pinaagi sa pagtanyag og panagang batok sa COVID-19:
Ila ang upat sa walo ka kandidatong bakuna nga nakaabot na sa Phase 3, ang kataposang hugna sa clinical trials;
Pagpapas sa pasangil nga ang ilang pagpabaya sa Wuhan maoy nakapakatap sa kagaw sa tibuok kalibotan;
Di kabalibad sa mga bakuna bisan ang mga nasud nga ilang gikasungi sa South China Sea ug ubang bahin sa kalibotan; ug
Suwayan nila paghulip ang dakong haw-ang nga namugna sa pagbiya sa Estados Unidos gikan sa kalibotanong liderato ug sa pagsipong sa nag-ung-ong nilang mga bakuna.
* * *
Di hinuon tanang nasud ang nihangop sa diplomasya sa bakuna sa China. May nagduda gihapon sa kakasaligan sa ilang mga bakuna nga gipamugos na sa ilang kasundalohan ug health workers bisan wa pa masugdi ang Phase 3. May naalarma sab sa bangis nga mga kundisyon sa mga pautang.
Samtang mapasalamaton, gikuwangan rang kadagkoan sa Bangladesh sa gitanyag sa China nga libreng 110,000 ka bakuna. Kay wa ra sa kumingking sa panginahanglan sa 170 milyones nila ka molupyo.
* * *
Laing timaan nga di lunsay ang tabang nga gitanyag sa China sa ubang kanasuran: Nagdumili sila hangtod karon sa pagpaluyo sa Covax, ang kampanya sa World Health Organization (WHO) paghugpong sa kabos ug adunahang kanasuran alang sa makiangayon nga pag-apud-apod sa bakuna o mga bakuna nga mamugna batok sa COVID-19.
Mas grabe hinuong paugat ni US President Donald Trump. Gawas nga gibakwi ang tanang hinabang alang sa WHO, gipakyaw pa gyong daan ang nag-unang mga kandidatong bakuna sa Estados Unidos ug sa Uropa.
- Latest
