Tabang sa mga tinun-an sa Jaclupan
Dihang nitidlom ang gidaghanon sa mga tinun-an nga nagpalista sa Jaclupan National High School (JNHS) sa bukirang bahin sa Dakbayan sa Talisay sa habagatang Sugbo niadtong Abril, nabalaka ang mga magtutudlo nga magmingaw ang gitakdang pagbalik sa klase bisan sa pandemya sa COVID-19.
Nakasabot hinuon sila unsay nakapa-islag sa mga tinun-an. Ang JNHS pito ug tunga ra ka kilometro gikan sa Talisay City Hall apan ang kinadul-ang agianan maong ngilit sa pangpang sa Manipis ug ang mga tinun-an kinahanglang mokatkat og bungtod ug motabok og sapa aron makaabot sa eskuylahan.
* * *
Ang mga tinun-an sa JNHS naggikan sa 50 ka sityo sa Kampo 3, 4 ug 5. Pipila nila—labi nang mga nagpuyo sa mga sityo sa Buad ug Gaang duol sa utlanan sa Dakbayan sa Sugbo—mapugos og baktas kay di maabot sa mga sakyanang pamasahero.
Labihan kalayo ug kalisod sa mga agianan nga may mga tinun-an nga kinahanglang buhian sa mga magtutudlo og alas-4:30 sa hapon aron nga makaabot sa ilang mga pinuy-anan sa alas-7 sa gabii. Pun-an sa hulga sa Covid-19, abunda ang sukaranan sa JNHS sa pagtahan.
* * *
Apan ang 36 anyos nilang prinsipal, si Eamon Alido, nga lumad nga taga Catubig, Northern Samar ug napadpad sa Talisay tungod sa bakanteng katungdanan sa eskuylahang publiko nga way ganahang mokuha, determinadong mohatag sa mga tinun-an sa tanang kahigayonan sa pagkat-on.
Nadasig sa kaubang magtutudlo nga sakop sa simbahan nga nigamit og FM radio sa ilang kalihokan, nilampos si Eamon paghiusa sa mga ginikanan, mga magtutudlo, Departamento sa Edukasyon (DepEd) ug mga boluntaryo pagtukod og estasyon sa radyo sud lang sa duha ug tunga ka buwan.
* * *
Andam nang JNHS Radio Station sa 88.1 MHz sa pagpasabot sa mga magtutudlo sa modules nga i-apud-apod sa nasabotang 20 ka abtanan sa pagsugod sa klase sa mga eskuylahang publiko karong Oktubre 5.
Apan nagkinahanglan sila sa atong tabang. Sa 1,645 nila ka tinun-an, 1,129 ang way radyo. Nakatigom ang mga magtutudlo og kapin sa 400 ka radyo gikan sa matinabangong mga molupyo.
Sa kataposang ihap ni Eamon, kuwang pa sila og 679 ka FM receivers. Kon duna kay matabang, ma-text o matawgan ang JNHS sa 09759726369.
* * *
- Latest
