Mas striktohon pagptuman sa mga restrictions

Karon nga na-MGCQ na ang atong dakbayan, akong tan-aw dili maayong lugakan ang pagpatuman sa mga health protocols, dili maayong mo-relax na kita, kay kon buot hunahunaon, ang coronavirus is still very much with us.

Ug tungod kay mas daghan nang mga tawo ang manggawas gikan sa kabalayan, mas daku na ang kahigayonan sa pagpanakod. Insakto ang gihimo ni Mayor Edgar Labella pagpadayon sa mga restrictions aron dili makahigayon ang virus pagpakuyanap.

Atong ipadayon ang self-discipline ug pagtuman sa mga health protocols nga i-imposed kanato sa kagamhanan. After all, alang man kini sa kaayohan natong tanan.

Ug atong hangyoon ang nagpabilin nga gahig ulo, nga unta ayaw na intawon mog pabadlong aron dili kita mobalik sa ECQ.

Karon, na-arang-arang na ang atong kahimtang. Kini gumikan sa mga paningkamot sa kagamhanann pagbatok sa makalilisang nga kagaw … ug labaw sa tanan, kini gumikan sa cooperation sa mga Sugbuanon, nga after all, dili diay gahig mga ulo.

Kitang mga senior citizen, lugwayan lang gyud una nato ang atong pagkabilanggo sulod sa atong mga pinuy-anan. Mangita lang tag mga paagi nga dili kita mapul-an ug ma-bored. Puyo o stay home lang gyud una ta.

Sugod na ra ba ang mga “Ber” months, ug sa dli madugay manimaho na ang Pasko. Ang mga estasyonan sa radyo nagkompetensiyaay kinsa ang makauna pagpatugtog sa mga alawiton sa Pasko.

Hinaut nga ang coronavirus dili maka-dampen sa atong kaikag pagsaulog sa Pasko. Kita ra ba dinhi sa Pilipinas maoy dunay labing taas nga Christmas season, sugod sa mga “Ber” hangtud na sa pag-Sinulog. Hinaut nga niining mga panahona, ma-new normal na kita.

Maorag hapit na gyud tingali ma-available ang vaccine nga makapatay sa coronavirus. Daghan nang mga vaccine ang karon gi-undergo og mga clinical trials sa nagkalainlaing dapit sa kalibutan.

Dinhi sa ato, kining headline nga napatik sa Philippine Star: “Cavite set to begin COVID-19 vaccine trials. The Cavite provincial government will start next month the clinical trials for the coronavirus disease 2019 vaccines of pharmaceutical companies in the US and United Kingdom, Gov. Juanito Victor Remulla announced yesterday.”

Ang balita gipitsahan Augusto 29, nagpasabot nga sa mga sunod semana magsugod na sila sa ilang gitawag nga experimental trials uban sa 10,000 ka tawo, ubos sa pag-supervise sa De La Salle Medical and Health Sciences Institute.

Matud ni Gov. Remulla, 5,000 ang makadawat sa vaccine, samtang ang laing 5,000 hatagan sa placebo. Sagad sa mosalmot sa trials nagpanuigon og 21 ngadto sa 45, giisip nga mga high-risk individuals, susceptible to the virus,  gumikan sa nature sa ilang mga trabaho.

Kini naglakip sa mga police, mga driver sa public utility vehicles, ug mga factory workers. Matud ni Remulla: “I think these are the ones who are most vulnerable. They are spreaders of the disease.”

Lagmit malakip usab ang mga senior sa experimental trials, apan, wala mohatag si Remulla ug numero pila ka senior ang makasalmot, apan, giseguro nga safe ang maong mga vaccine. “We have been assured by the developers that clinically it’s not a dangerous vaccine,” nagkanayon si Remulla.