Partisipasyon sa budget

Sa unang higayon, hatagan og kahigayonan ni House Speaker Alan Peter Cayetano nga direktang makaapil sa pagtuki sa giduso nga P4.5 trilyones nga budget alang sa tuig 2021.

Sa pahayag nga gipagawas, giingon ni Speaker Cayetano nga mag-abot ning semanaha ang tag-as nga opisyal sa Ubos Balay Balauranan. Kini aron ilang sabotan ang laraw kun unsaon nga direktang makaapil o makasalmot ang publiko sa pagdungog sa gisugyot nga budget nga gastoon sa nasudnong kagamhanan alang sa tuig 2021 niini nga operasyon.

Gusto sa speaker nga makasulti ug mahatagan og kahigayonan nga madungog ang tingog niadtong gusto nga mosulti. Kita ang balay sa katawhan. Atong tukion ang salapi sa katawhan busa kinahanglan nga aduna silay tingog niini. Kinahanglan nga makahatag sila sa ilang opinyon, kun unsa ang gusto nila nga unahon ug mismo sila ang unang makakita sa proseso.

Pagpakita usab kini sa pagkaklaro ug tulubagon sa mga kongresista ngadto sa katawhan. Mao kini ang mga rason nganong direktang pasalmoton o paapilon ni Speaker Cayetano ang katawhan sa pagtuki sa budget.

Tumong ni Speaker Cayetano nga mahuman nila ang budget sulod ning buwan sa Septyembre aron masumitir dayon kini sa Senado aron sa tunga-tunga o katapusang bahin sa Nobyembre aprobado na kini.

Dili ikalimod nga maayo ang tumong sa speaker pero dili kaha hinuon malangay ang pagtuki sa nasudnong budget ina kay madali? Langay man gani ang pagtuki sa nasudnong budget nga sila lang mga kongresista ang nagtuki niini, unsa pa kaha kun ila nang paapilon ang mga tawo?

* * *

Sa gipagawas nga Executive Order #089 ni Mayor Edgardo Labella, dili pa gihapon puwede nga makagawas ang mga nag edad og 21 paubos ug 60 pataas bisan pa man og gipaubos na ang dakbayan sa Sugbo sa modefied general community quarantine. Pero daghan man ko’ng nakit-an nga mga minor de edad ug mga tiguwang nga nagsuroy-suroy. Unsa man, exempted ni sila?

* * *

Karong adlawa, gisaulog ni Quiot, Cebu City Barangay Councilor Eduardo “Edie” Llamedo ang iyang natawhan. Happy birthday, Kap! Kun pila na iya edad? Secret.