Nganong nahimong modelo ang Japan

Natay-og ang kalibotan sa niaging semana sa dihang mianunsiyo si Japanese Prime Minister Shinzo Abe nga moretiro siya sa iyang katungdanan gumikan sa seryosong problema sa iyang panglawas nga dugay na kuno niya nga gihambin.

Nangayo og pasaylo si Abe ngadto sa katawhan sa iyang nasud tungod kay dili na niya mapadayon pa ang iyang katungdanan gumikan sa gihambin niining colitis, usa ka inflammatory bowel disease nga giingong dili na kuno maayo.

Maayo ang pagpadagan ni Abe sa Japan. Sulod sa upat ka termino nga nahimo siyang primero ministro sa maong nasud, milambo pag-ayo ang Japan sa natad sa ekonomiya ug internasyonal nga diplomasiya.

Isip maoy longest-serving prime minister sa Japan, usa si Abe sa labing maayo nga pangulo sa labing adunahan nga nasud sa Asia. Bisan ang ubang mga world leader dako og pagdayeg sa kalantip sa iyang salabotan.

Dako nga kawad-on sa Japan ug sa internasyonal nga komunidad ang pagkanaug ni Abe sa iyang katungdanan. Ilalum sa iyang liderato, hilabihan ang pagkuyanap sa inpluwensiya sa Japan sa Asia, Europe, Middle East ug Latin America sa natad sa Japanese investment.

Niining panahon nga krusyal ang papel nga gihuptan sa Japan sa world affairs taliwala niining COVID-19 pandemic ug global recession, nagkinahanglan ang maong nasud og maayong lider nga susama sa kalidad ni Abe.

Sa laing bahin, daghan ang midayeg kang Abe sa iyang desisyon pag-resign sa katungdanan tungod sa balatian. Dili usab ikalalis nga maayo ang iyang pagdumala sa Japan ug daghang world leader ang nanghinayang sa iyang lakang pagkanaug sa pwesto.

Hinuon normal kana nga panghitabo sa Japan. Isip labing disiplinado nga nasud sa kalibotan, ordinaryo na nga panghitabo didto kun adunay mga opisyal sa kagamhanan nga mo-resign sa katungdanan taliwala sa mga kontrobersiya.

Usa kini sa mga birtud nga gibiliban sa tibuok kalibotan sa Japan. Mao nang dili gani nato ikatingala nga minos ang corruption sa maong nasud ug nga usa kini ka modelo sa natad sa ligdong nga pangagamhanan.

Hinuon, dili sama dinhi sa Pilipinas, hilabihan ka lig-on ang pundasyon sa pulitika didto sa Japan. Taliwala niining pagpili unya og sunod nga lider puli kang Abe sa maong nasud, walay politikanhong kaguliyang ang atong mapaabot didto.