Sinsero nga panerbisyo

Para kanako, bisan og unsa ka banggiitang mga professional ug mga kanhi opisyal sa kagamhanan, ang ibutang sa usa ka pwesto, dili gihapon nindot ang serbisyo kon ang mao nga mga tawo dili sinsero sa ilang katungdanan.

Unta, ang mga appointing authority, motimbang-timbang gyud pag-ayo kon ang mga tawo nga ibutang nila sa pwesto sinsero ba gyud nga mangalagad, kay basin makatumong sila og mga tawo nga nag-apas lang sa madawat nila nga sweldo o kaha dagko nga honorarium.

Hisgotan nato ang MCWD. Dili ra kay ang Dakbayan sa Sugbo ang giserbisyohan sa mao nga water district ug mao man gani nga diha sa MCWD Board dunay representante ang probinsya sa Sugbo. Naa sab diha ang usa ka kanhi mayor, kanhi konsehal, abogado ug uban pa nga professional.

Apan ang pangutana kon sinsero ba sila nga naglantaw aron pagsulbad sa problema sa kanihit sa tubig nga giantos karon sa katawhan, dili ko makaingon nga silang tanan, anaa niini.

Nakaingon ko nga ang mga appointing authority angay nga mohashas gyud pag-ayo sa iyang itudlo tungod kay dugay na kaayo nga way maayong serbisyo ang MCWD.

Sa downtown area sa Cebu City, ang uban moreklamo kon hinay ang agas sa ilang mga gripo. Ang uban kada kaadlawon ra kuno moagas. Apan kami diri sa may Marco Polo Plaza Hotel, human ilisi si Rene Mercado pagka chairman sa MCWD mga upat ka tuig na, wa na mi agas sa gripo.

Aw, moagas panagsa kon maghatod ang water tanker sa MCWD, usahay kausa, ug usahay kaduha sa usa ka semana. Kada hatud, kon 10 cubic ang tangke sa maghatud, makatigum ko og hapit duha ka baril, apan kon 6 cubic ra gani, di kaabot og usa ka baril ang akong matigum.

Bi kamo kuno ang mabutang sa akong pwesto mga opisyal sa MCWD, kon dili ba kamo makasaway sa dakong palpak. Si Mercado kaniadto nagplano nga ang MCWD mokuha og tubig gikan sa tin-aw nga sapa sa Barangay Bonbon, ug ipundo sa dakong tangke nga himoon sa Babag.

Apan ang plano wa madayon kay unsaon, ang kanhi mayor mipatangtang ni Mercado nga tinudlo sa iyang kontra sa politika, ug gipuli niya ang iyang “drinking body” nga sulti ra’y nag-ayo. Nagbuwabuwa lang ang baba kon mosulti, nga mangalagpot ra’ng laway apan way nahimo.

Wa ko moingon nga ibalik si Mercado sa pwesto, apan kinahanglan nga ang tawo nga mogunit og dagko nga katungdanan sa MCWD may panglantaw gyud nga sulbaron nila ang kanihit og tubig sa katawhan.

Dunay uban nga kon maghisgot na ta og sensitibo nga isyu, dili motubay, apan kon kataw-anan gani pwerte nga motubay. Pastilan.