Numero sa COVID-19 sa Sugbo
Sulod sa taas nga panahon 76 sa 80 ka mga barangay sa dakbayan sa Sugbo may natakdan sa coronavirus disease 2019 o COVID-19.
Kaniadtong Martes, 41 na lamang ka barangay ang may kaso sa COVID-19 human makalingkawas ang 31 gikan niini. Samtang ang 4 - Taptap, Paril, Sudlon I ug Buot - nagpabilin nga walay COVID-19.
Sa datus nga gipagawas sa DOH niadtong Agosto 23, miabot na sa 9, 512 ang mga natakdan sa COVID-19 sa dakbayan sa Sugbo sukad niadtong Marso apan ang 7, 632 kanila nangaayo na. Buot ipasabot, 1, 257 na lamang ang wala pa maayo.
Ang dautang balita, miabot sa 634 ang namatay tungod sa COVID-19 sa dakbayan sa Sugbo ug ning maong gidaghanon, 359 ang namatay sa buwan lamang sa Hunyo.
* * *
Basi sa datus sa Philippine National Police gikan sa 10 ka mga barangay sa dakbayan sa Sugbo ang mga malapason sa quarantine protocols gikan Agosto 1 ngadto sa 15. Kini gilangkoban sa Lahug, Labangon, Guadalupe, Banilad, Punta Princesa, Sambag I, Sambag II, Mabolo, Talamban ug Hipodromo.
Samtang ang sa Agosto 16 hangtod ning pagsuwat gilangkoban sa Sambag I, Suba, Calamba, Ermita, Mambaling, Carreta, T. Padilla, Punta Princesa, Basak Pardo ug Lusaran.
Unsa man, ang top 10 lang ni sa mga barangay nga daghang badlungon o mao lang gyod ni ang Barangay nga may mga badlungon?
* * *
Sa lalawigan sa Sugbo, pito na ka mga mayor ang natakdan sa makamatay nga virus ug ang pinakauwahi kanila mao si Alcoy, Cebu Mayor Michael Angelo Sestoso. Nag-una ni Mayor Sestoso mao sila si Lapu-lapu City Mayor Junard “Ahong” Chan, Daanbantayan Mayor Sun Shimura, Barili Mayor Marlon Garcia, Tuburan Mayor Danilo Diamante, San Fernando Mayor Lakambini Reluya ug Asturias Mayor Jose Antonio Pintor.
Maayo unta og dili na sila mapun-an.
- Latest
