Suliran nagpabilin

Kapin na sa unom ka buwan sukad gitangtang ug gihulipan ni Cebu City Mayor Edgardo Labella ang mga sakop sa board sa Metro Cebu Water District (MCWD) tungod sa ilang kapalpak pagsulbad sa kakuwang sa supply sa tubig dinhi sa dakbayan.

Pebrero 17 dihang nanumpa ang bag-ong mga sakop sa MCWD board pinangulohan ni Atty. Joey Daluz atubangan ni Labella. Ang mga konsumidor puno sa paglaum nga mahatagan og kasulbaran ang dugay nang reklamo sa dili maayong serbisyo sa water utility ubos sa bag-ong mga sakop sa board niini.

Sanglit ang di maayong serbisyo maoy gigamit nilang puhonan aron sikaran ang kanhi mga opisyal, dako ang pagsalig sa publiko nga mas takos ug dunay sulosyon sa problema ang bag-ong mga milingkod nga opisyal.

Apan hangtud karon nagpabilin ang problema ug way kalainan sa sitwasyon atol sa panahon sa kanhi mga opisyal nga ilang gitulisok ug gipasanginlang inutil pagsulbad sa problema. Hangtud karon padayon ang bagulbol sa mga konsumidor sa tubig tungod sa kakuwang sa supply.

Way nausab sa pag-antos sa mga konsumidor nga magbantay sa ilang gripo hangtud sa kadlawon aron makapamundo sa tubig nga gikinahanglan kaayo labi na niining panahon sa pandemya. Ang kagamhanan sa dakbayan kanunay nga nag-agni sa publiko nga batasanon ang regular nga pagpanghunaw sa kamot aron malikayan ang COVID-19. Sigun sa World Health Organization (WHO), ang pagpanghunaw kanunay sa kamot maoy unang depensa batok sa makamatay nga sakit. Apan unsaon paghimo niini sa publiko kun ang MCWD napakyas sa ilang tahas paghatud og igong supply sa tubig ngadto sa matagpinuy-anan 24 oras?

Aron paghulip sa dako nilang kakuwangan, ang MCWD magpadala og mga water tanker ngadto sa kabarangayan.

Arang-arang nalang unta ni, apan ang problema kay tungod sa panag-ilog sa tubig usahay malimtan na sa katawhan ang pagsunod sa hustong mga lagda sama sa “social distancing.”

Hinaut wala mohunong ang MCWD sa pagpangita og sulosyon sa problema sa supply. Ug hinaut sayran ni Daluz ang publiko unsay nahitabo sa iyang pagpakighinabi sa mga bulk water suppliers sa nanlabay’ng mga buwan ug nganong kalit lang siyang nahilom?