Dili mokumpiyansa

Gipahibawo sa Inter-Agency Task Force niadtong niaging semana nga napislat na ang miburot nga kaso sa mga nagpositibo sa coronavirus disease dinhi sa Sugbo. Buot ipasabot, makontrolar na sa gobyerno ang mananakod ug makamatay nga virus.

Apan giawhag ni Cebu City Mayor Edgardo Labella ang mga Sugboanon sa dili pagkompiyansa tungod kay anaa pa gihapon ang presensiya sa virus.

Sakto ang mayor. Dili gyud magkompiyansa sa pagkapislat na sa coronavirus dinhi sa Sugbo tungod kay sa kanunay anaa ang dakong posibilidad nga mosaka kini pagbalik sama didto sa mga nasud sa Germany, Spain, France, South Korea ug Japan.

Tungod kay nagdali ang katawhan ning maong mga nasud sa pagbalik normal sa ilang kinabuhi ug sa ilang ekonomiya, misaka hinuon pagbalik ang ilang kaso sa COVID-19. Busa hagit karon sa kagamhanan sa dakbayan ug sa mga Sugboanon ang pagpadayon sa pagpaubos sa gidaghanon sa kaso sa COVID-19 hangtod nga kini mawagtang na sa hingpit samtang hinay-hinay kitang mibalik ngadto sa normal nga kinabuhi ug mipabangon sa nalukapa nga ekonomiya.

Sa balita nga nagkadaghan ang mga kaso sa COVID-19 sa mga trabahoan, buot ipasabot nga mibalhin na ngadto sa trabahoan ang pagpanakod sa COVID-19 ug wala na kini sa komunidad.

Busa kinahanglan nga dili mokumpiyansa ang mga magpapatigayon ug ang ilang mga kawani. Dili ikalimod nga napugos ang gobyerno sa pag-abli sa mga negosyo nga gisirad-an tungod sa pag-angal na sa mga magpapatigayon ug sa paglukapa na sa ekonomiya. Apan gikinahanglan usab ang pagseguro nga dili makompromiso ang panglawas sa katawhan ilabi na sa mga Sugboanon.

Busa kinahanglan nga estriktong sundon ang mga health protocols nga gipatuman alang sa pag-abli pagbalik sa negosyo bisan pa man kun gasto kini alang sa mga magpapatigayon ug sa mga kawani niini. Ang mahinungdanon, ang tanan luwas sa peligro nga dala sa COVID-19.