EDITORYAL - 26 –anyos na kita!

Karong tuiga nasinati sa mga Pilipino ang grabeng kalisdanan tungod sa novel coronavirus disease nga niresulta sa pagpanira sa daghang mga balay patigayon tungod sa gipatumang mga community quarantines.

Sa panahon karon, labing gikinahanglan sa publiko ang tukma ug mahinungdanong mga impormasyon kabahin sa mga panghitabo sa nasud, gikan sa mga gipangbuhat sa gobiyerno batok sa pandemiya, mga kalamboan bahin niini.

Karong adlawa Agosto 23 maoy ika-26 nga anibersaryo sa panerbisyo sa publiko sa inyong kinaham nga Banat News. 

Bisan sa kalisod ning panahona  atong handumon kining adlawa bisan sa simpleng paagi.

Sud sa maong mga katuigan gikauban sa mga Sugboanon ug sa mga Bisaya ang Banat News sa ilang inadlaw-adlaw nga panginahanglan sa mga impormasyon ug kasayuran.

Sama sa gihapon walay paglubad kining inyong paboritong basahon sa paghatud kaninyo sa mga lab-as ug haom nga balita, kalingawan, paugnat sa kusog ug bisan mga bag-ong tsismis bahin sa mga artistang ginungtan.

Bisan ang COVID-19 wala kapahunong sa Banat News sa pagmantala tungod kay sayod kami nga mas labaw kaming gikinahanglan sa katawhan karong mga panahona.

Gidawat niini uban sa mga sakop ug tagdumala ang hagit sa pandemiya aron masayran sa mga tawo ang mga kinahanglang impormasyon.

Ang social media paspas kaayong tinubdan sa mga impormasyon apan dili kasaligan ang ilang gipatik kun diin gikan ug kinsa ang mga nagsuwat ug ilang motibo.

Samtang ang Banat News, purong balita ug matinud-anong impormasyon lang maoy gimantala tungod mao man ang papel niini sa katilingban.

Subo lang nga daghan sa mga tawo ang motuo sa mga bakak nga gipatik diha sa social media nga gihimo sa dinali-dali nga paagi aron lang adunay ikasulti o ba kaha wala silay laing lingaw. Walay laing giampo ang Banat News para sa tanan kondili ang kaluwasan ug kalamposan gikan niining mahagitong panahon sa COVID-19.

Kami nagpasalamat sa padayong pagsunod sa atong mga lunlong tigbasa ug among ikapasalig nga magpadayon kami pagserbisyo kaninyong tanan.

Maayong ika-26 ka tuig kanatong tanan. Mag-uban kita pagbuntog sa pandemiya.