Walay bili ang dignidad

Gipanghimakak ni Secretary Duque ang pasangil sa whistleblower nga si Atty. Thorrsson Montes Keith nga siya kuno ang “godfather” sa mafia nga naglihok diha sa PhilHealth. Matud ni Sec. Duque masayon ang pagpasangil apan kinahanglan nga adunay ebidensya usab nga ipakita.  Wala na gayud diay mauso kanato ang kamahinungdanon sa dignidad. Nahinumdum lang hinuon ko sa akong higala’ng pulis nga sa dihang akong gilamano kay gibaniog man nga siya na ang “hari-hari” kon hepe sa usa ka presinto, mikomedya sa pagtubag, “Sugot na lang ko tawgon og “HARI-HARI” Bay, bisan dili tinuod, kay sa inyo ko’ng tawgon og “RAYNA-RAYNA”. Tua ra!

Pabagâ-ay sa nawong

Sa laing bahin, ang kanhi Presidente sa Colombia nga si Alvaro Uribe, miluwat sa iyang katungdanan pagka-Senador, human siya gipaubos sa imbestigasyon tungod sa alegasyon nga “witness tampering”, usa ka matang sa “obstruction of justice”. Gamay ra kini nga salaod kon itandi sa kurapsyon.  Sukwahi kini sa gibuhat sa mga PhilHealth officials nga bisan sa nagtapun-og nga pasangil ug natun-as na nga pagsalig sa katawhan, mopilit lang gihapon daw linta sa iyang katungdanan. Unsa gyod kaha ang tinubdan sa kabagâ sa ilang nawong?  Fezteleern!

 Balaod batok diskriminasyon

Aduna na’y napasar nga ordinansa sa dakbayan sa Sugbo nga magsilot niadto’ng mo-discriminate ug mobugal-bugal sa mga tawo nga nahiagom apan naayo na sa mananakod nga sakit lakip na kadtong nasakit sa COVID-19. 

Multa ug priso ang silot sa makalapas sa maong ordinansa.  Wala hinoon moingon nga silotan usab kadtong mobugal-bugal mismo sa coronavirus.  Busa pwede ra mo-ingon, “Nasayod ba kamo nga si COVID-19 nataptan ni Polano? O ba kaha moingon nga “Ayaw baya kamo paduol ni coronavirus ha, kay nataptan baya na siya ni Polano”.  Pagkatoytoy!

 Knockout sa virus

Human sa 35 ka tuig nga pag-promote sa boxing ug pag-amoma sa daghang mga boksingero, gitak-opan na sa ALA Boxing Promotions ang ilang patigayon ug buhian na nila ang ilang mga boksingero tungod kay dili na nila masugakod ang galastohan sa pagmintinar sa maong patigayon. 

Dili lang diay suliran sa panglawas sa katawhan ang nahiagom sa kabangis sa COVID-19.  Ang patigayon sa boxing gikulata usab sa coronavirus nga nakapa-“KNOCK OUT” sa kaugmaon sa daghang mga boksingero. Saoonz!

 Recycled nga suliran

Tungod sa nagkamenos nga presyo sa kopras nga nakapaping-it sa mga coconut farmers, milihok na ang kagamhanan aron masolusyonan ang maong suliran. Dugay na man kining problemaha apan kon makahisgot niini ang kagamhanan, daw bag-o lang nga mitumaw ang maong gumunhap nga mihamok sa mga mag-uuma. 

Haum ang giingon ni Abraham Lincoln, “Dili ka maka-eskapo sa imong kaakohan sa umaabot pinaagi sa paglikay sa imong kaakohan karong adlawa”.  Galamlam lang!