Nakaamgo

Human mangugat ug miinsister nga gikinahanglan gyud ang barrier sa mga maglumon sa motorsiklo, nakaamgo ra ang mga sakop sa Inter-Agency Task Force (IATF) sa hinanggaw nilang polisiya.

Ambot unsang hangina ang mihampak nila, apan maayo ni nga kalamboan alang sa mga kabus nga way laing kasakyan paingon sa trabaho gawas sa motorsiklo.

Ang IATF mitugot na sugod kagahapon sa pag-angkas sa motorsiklo nga wala magkinahanglan og barrier diha sa mga dapit nga ubos sa general community quarantine (GCQ) sama dinhi sa dakbayan sa Sugbo.

Apan kadto lang nagpuyo sa usa ka panimay ang gitugutan.

Kinahanglan sab nga ang angkas usa ka APOR kon authorized person outside residence sama sa mga medical frontliners.

Kinahanglang pribado ang motorsiklo ug nagsul-ob og face mask ug full-face nga helmet ang driver ug ang iyang angkas.

Kadtong wala mag-ipon og puyo kinahanglan gihapon ninyo ang barrier.

Ang IATF mihatag og gahom sa mga local chief executive sa mga dapit nga ubos na sa modified general community quarantine (MGCQ) sundon ba ang maong lagda o mopatuman sila og ilang kaugalingon depende sa sitwasyon sa ilang dapit.

Salamat nga nakaamgo ra ang mga nagpakaaron ingnon nga mga maayong laki sa IATF ug naminaw sa mga tinuod nga eksperto ug sentimento sa publiko.

Ang mga batid sa motorsiklo mipasidaan nga dilikado ang paggamit og barrier tungod kay posible ning mahimong hinungdan sa aksidente.

Wa say pruweba nga epektibo ni pagpugong sa pagkaylap sa kagaw sa COVID.

Sigun sa mga eksperto ang pagsul-ob og face mask ug full-face nga helmet mas praktikal nga panagang sa COVID kay sa barrier nga gi-require sa IATF.

Apan sulod sa taas-taas nga panahon gibarugan sa mga opisyal sa IATF ang hinanggaw nga lagda.

Gani diha pay opisyal sa Department of Interior and Local Government nga mipasiatab nga duna kunoy science nga nagpaluyo sa ilang requirement sa barrier.

Gihulga pa nila si Gobernador Gwen Garcia nga ikiha kun moinsister nga itugot ang angkas nga dili mogamit og barrier.

Niining labing awahing kalambuan sa maong kontrobersiya tataw kinsay husto ug nagmadaugon.

Daghan na hinuon sa mga tag-iya og motorsiklo ang nakagasto tungod sa way hinungdan nga polisiya.