Mga gutom

Pobre ang Pilipinas. Minilyong kabos ang nag-antos sa kagutom. Misamot, pagbutho sa makalilisang nga COVID-19! Mga trabahoan, tindahan, simbahan ug pinuy-anan gipangsirhan.

Milanog ang mga tiyabaw sa halos tanan, kinsa nawad-ag inadlawng kapanginabuhian.

Nagkapuliki intawon ang panudlanan sa atong gobiyerno pagpanagang unsaon sa pagpakig-away aron makalahutay ang katawhan ning dakong bugno nga ingon sa wala nay kahumanan.

Tanang pundo nga alang sa emerhensiya gigamit. Tanang tuboran nga mahimo pang makawsan gitilok. Lamang, aron ihinabang ngadto sa tanang tawo nga nanginahanglan.

Bilyonbilyong pesos ang gipagawas sa palasyo. Gipamalit og medisina, materyales ug nagkalainlaing kahimanan diha sa seryosong pagpakiggubat sa COVID -19. Usab maoy gigamit para sa Special Amelioration Program (SAP) o uban pang matang sa legal nga gastohanan.

Apan sakit kaayo paminawon ang makaluluoyng siyagit sa mga gipanggutom tang kaigsuonan, kinsa daghan ang wala makatilaw bisan pinisik na lang sa hinabang sa gobiyerno nga gigahin alang kanila.

Kay ang mga gipiling lider ni Tatay Digong sa nagkalainlaing ahensiya, diin adto motugpa-agi ang binilyong salapi, (hinuon dili tanan) mas gutom pa man diay kay sa mga kabus sa atong nasud, kinsa hagbay rang nagkamang sa kalisod.

Kaanugon sa dakong pagsalig nga gihatag sa presidente kanilang mga pinili, kinsa maoy gipadumala sa mga dagkong buhatan sa gobiyerno nga gibaslan lamang nilag makauulawng buhat nga nakapahugaw sa limpiyong tigbayon nga gisugdan ug gisigehan nag tukod ni Duterte sukad pa niadtong unang adlaw sa iyang paglingkod sa Malakanyang.

Inay ilang tabangan si Duterte pagtukod og limpiyong gobiyerno, sila pa hinuon ang nangunay sa paghugawhugaw ug paggun-ob.

Ning panahon sa pandemiya, padayon ang pagbutobuto sa mga dagkong anomaliya. Ang miaging pag-overprice sa gipamalit nga Personal Protective Equipment (PPE) gear, swab test kits for coronavirus sa Department of Health (DOH), ug niining bag-o, ang P15 billion nga gi-Mafia kuno sa mga top executives sa Philippine Health Insurance Corporation (PhilHealth), pipila lamang sa daghang kontrobersiya nga gituki-imbestigahan sa Senado, diin sa ilang pag-ukab, mialisngaw ang tinagoang pamaagi sa grabeng kinawatay.

Miprangka si Duterte nga nahurot na ang kuwarta sa atong nasod. Ug si kinsa ba tinuoray ang nakahurot niini?

Ang mga gipanggutom nga pobre, o ang mga gutom nga mangalagad, kinsa naulipon sa kangitngit?