Pagkamakanunayon

AGOSTO 16, 2020: Ikakawhaan nga

 Domingo sulod sa tuig

Mga Pagbasa: Is. 56;1,6-7/Sal. 67

/Rom. 11;13-15,29-32/Mt. 15;21-28

Kun dunay panginahanglan buhaton gyud ang tanan mahatgan lang og kasulbaran ang bisan unsang gihambin nga suliran. Mao kini ang nahitabo sa babaye sa atong ebanghelyo karong Dominggoha bisan kun makapila tawon siya buyaga kay lagi saba man kaayo sa iyang pagpunay og hangyo ug bisan pa man kun nakadungog siya og insulto diha sa pagtandi kaniya ngadto sa usa ka iro sanglit kay siya dili man Judiyo kondili pagano. Apan ang iyang pagtuo sa kaulahian maoy nagmadaugon ug niadto gyud dayong gutloa naayo ang iyang anak.

 Ning panahon sa dakong pandemiya daw sa gisuwayan ang atong pagtuo. Pagtuo sa gahum sa Dios nga mahanaw na gyud unta sa hingpit kining maong kasakit nga nasinati sa kadaghanan.

Pun-an pa sa gipanghimo ning mga opisyal nato (hinuon dili tanan) nga nihimo og ilad kanato pinaagi ning mga pa goryogoryong pangawkaw.

Dunay uban nga miingon: “Ilaha pud na, suporta lang gud ta?” Unsaon nimo pagsuporta sa mga tawong wala gani pagpakabana alang kanato? Bisan gani ang mga frontliners kang kansang hazard pay, ambot kun nahatag ba gyud as promised.

 Ang pagtuo wala man magpasabot og buta nga pagtuo. Kinahanglan nga duna sab kini rason. Dili sa tanang higayon nga sige lang ta og ingon amping lang ta… sunod lang ta… siya ra gyud ang nasayud… blah blah….. Lisod ang mamahimong die hard o panatiko.

Apan lahi sa gihimo sa maong babaye sa atong ebanghelyo tinud-anay siya nga dunay panginahanglan ug hinurot ang pagsalig ngadto sa nailang Jesus nahitabo ang milagro. Si Jesus human niya makita ang pagkamatinud-anon sa babaye wala siya magduhaduha sa paghimo og healing miracle from a distance bisan pa man kun ang maong babaye usa ka pagano ug ubos kaayo sa panlantaw sa usa ka Judiyo.         

Ang pagkamaka-nunayon dako kaayo og kahimoan aron makab-ot nato ang atong mga gipangandoy. Mahimong ang kalibotan maato apan mag-unsa man kini kun sa Dios kita malayo? Ug unsaon man ang pagpunay og tuo sa sinaligan ang kansang mga panaad nagpabaliling kabahin sa dakong urom sa atong kinabuhi?