Sa PhilHealth pangitaon
BALITAHOM - Atty. Jose Marie N. Poblete (Banat) - August 16, 2020 - 12:00am

Paglabay sa 75 anyos human sa ikaduhang gubat sa kalibutan, gibanabana nga aduna pa’y usa ka milyon ka Hapones nga nangamatay sa gubat ang wala pa makaplagi. Malisod na ang pagpangita sa mga patay’ng lawas sa mga Hapones kay ang mga dokumento nangahanaw na ug ang mga kabanay wala na’y nahinumduman tungod sa katiguwangon.  Ang maayo tingale’ng buhaton sa Japanese government, adto sila mangita sa database sa PhilHealth kay bisan gani ang nagpangedaron og 130 anyos anaa pa man sa ilang record ug apil pa sa listahan sa beneficiary.  Hala no!

Komplemento, dili kompetensiya

Gikataho nga dili na kaayo kusog ang halin sa face shields didto sa Divisoria sa Manila bisan pa man sa pagtuman sa gisugyot nga retail price sa gobyerno nga 50 pesos.  Ang hinungdan kay halos tanang tindahan namaligya na og face shields. Kinaiya sa mga Pinoy entrepreneurs ang pagsundog-sundog, pulos na hinoon walay halin.  Angayan unta magkomplementohay inay magkompetensyahay. Sa ato pa, kon mamaligya ug mantikaan saging ang usa ka tindahan, ice water lang unta ang baligya sa tapad.  Kay human kaon sa saging, moinom man gyud og tubig ang customer.  Payts!

Uktaba kay kulang pa

Ang kamanduan pag-uktaba sa klase ngadto na sa Oktobre 5, 2020 nakakuha og nagkadaiyang reaksyon sa mga magtutudlo ug mga ginikanan.  Adunay magtutudlo nga nagpasalamat kay wala pa usab nila mahuman ang ilang mga modules.  Adunay maestra ug mga ginikanan usab nga nahisagmuyo kay andam na unta sila. Niining pagbalhin-balhin sa skedyul sa klase, mitumaw ang kamatuoran nga daghang palpak sa atong kagamhanan.  Tinuod ang panulithon nga “gikan sa usa ka sayop ngadto sa laing sayop, madiskobrehan gayod ang kamatuoran”.  Postpone pa more!

 Wa ka palanggana, baso kaMiimponer ang Pilipinas og temporary ban sa importasyon sa mga poultry meat gikan sa Brazil human mahibaw-i nga kontaminado sa COVID ang produkto nga frozen chicken wings gikan sa maong nasud. Ma-COVID pa gani ang na-frozen nga manok nga dili na moubo o manghatsing, unsa pa kaha ang tawo.  Mao nga amping lang gyud kita ug dili mokumpiyansa.  Kay matud pa sa akong higalang Intsik, “kon wa ka palanggana, baso ka”(Kon wa kay panagana, magbasol ka).  Madahaan!

Spaghetti pataas, pabâbâ

Ilusad pagbalik sa kagamhanan sa dakbayan sa Sugbu ang Spaghetti Wires Eradication Program.  Matud ni Konsehal Jerry Guardo, ubos sa maong programa, panguhaon ang mga nagsaw-id, mga “patay,” ug mga nangatagak ug nagkumbitay nga linya sa telepono nakahatag og mangil-ad nga talan-awon sa siyudad.  Salmotan ang maong programa sa nagkalainlaing telecommunications company.  Mahimong ba kahang sagupon nga theme song sa maong programa ang awit nga “Spaghetti Pataas, Spaghetti Pababa”?  Alegre kon mao!

PHILHEALTH
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with