EDITORYAL - Pagsibog sa klase

Subling gisibog ang petsa sa pagbalik na sa klase sa mga tinun-an, apan paigo na unta kining lugway nga mga adlaw aron makapangandam og maayo ang DepEd sa kinahanglang buhaton sa binag-ong sistema sa pagtudlo.

Kagahapong adlawa, gipahibalo ni DepEd Secretary Leonor Briones nga dili na sa Agosto 24 mobalik ang klase ug gisibog kini ngadto sa Oktubre 5 subay sa mando ni Pres. Duterte base sa ilang rekomendasyon.

Kinahanglang sa Oktubre 5, andam na gyud ang tanan ilabi na ang mga education modules nga ipagamit sa mga bata sa ilang pagtuon.

Dili palang dugay, daghang mga netizens nga nakasaway sa DepEd tungod sa mga sayop-sayop sa unod sa ilang leksyon nga gi-broadcast.

Ang mga sayop naglakip sa typographical errors o sayop nga pagkasuwat ug sayop-sayop nga grammars sa pinulongang English. Ang mga sayop nahitabo sa dihang una nilang gi-broadcast ang us aka multiple-choice nga pangutana.

Daghang mga tawo ang nakabantay dayon sa sayop ug miisa ang kilay. Ang uban anha mipadayag sa ilang pagsaway sa DepEd sa social media.

Maayo nalang nga dry-run palang kadto. Gihimo ang dry-run aron makita kun dunay mga problemang motumaw, ug tuod man, nakita dayon ang sayop.

Unsaon nalang kun duna gihapoy mga sama niadto nga mga sayop sa giandam karong mga educational modules? Busa, karon palang angay nang sugdan sa DepEd pag-review ang tanan niining learning materials sa mga bata.

Wa gyud masayop si Vice President Leni Robredo lakip na ang mga senador ug uban pang mga grupo sa ilang kabalaka kun unsa ka andam ang ahensiya sa bag-ong sistema nga distance learning.

Gani dili lang ang mga tinun-an ug mga ginikanan maoy nabag-ohan niini,  hasta ang mga magtutudlo sab nabag-ohan.

Ang pagsaway sa mga tawo sa DepEd dry-run dili angay ikalain sa maong ahensiya kay napamatud-an lang nga may nakat-onan gikan kanila ang mga tawo.