EDITORYAL - Ordinansa sa health protocols

Kinahanglang makontrol ug magdisiplina sa kaugalingon ang mga tawo aron mosunod sa binag-ong naandan o new normal tungod kay sa mosugot pa ta o dili, peligro gyud nga matakdan sa novel coronavirus disease ang si bisan kinsa.

Usa ka maayong pamaagi mao ang pagpasar sa mga local government units og mga ordinansang nagmando nga kinahanglang sundon sa mga tawo sa tanang oras ang mga health protocols.

Ang Cebu City ug ang ubang mga siyudad sa Metro Cebu nipasar na og kaugalingong mga ordinansa aron masunod ang health protocols ug duna kini silot nga pagmulta ug pagkabilanggo.

Dinhi sa Cebu City napasar niadtong Hunyo 26, 2020 ang City Ordinance No. 2566, or Ordinance Penalizing Any Violation in Relation to the Implementation of General/Enhanced Community Quarantine in Cebu City during Public Health Crisis.

Gawas sa multa, mapriso pa gyud og 30 ka adlaw ang mga malapason sa mga quarantine protocols. Sa unang paglapas pamultahon og P1,500 o prisuhon og 30 ka adlaw.

Apan sa ikaduhang kalapasan, P3 mil ang multa ug mapriso sab og 30 ka adlaw samtang sa ikatulong paglapas P5 mil ang multa ug mapriso sab og 30 ka adlaw.

Ang mga establisamentong makalapas sab sa mga lagda sa health protocols mamahimong masuspenso ang business permit.

Matud pa sa Briton nga political theorist nga si John Locke gikinahanglang adunay balaod nga tamdan para sa tanan aron maangkon ang tinud-anay nga kagawasan.

Magamit sab kini nga panultihon aning mga ordinansang gipatuman sa mga LGUs karong panahon sa pandemiya. Kinahanglan aron makab-ot ang kagawasang makaangkon ug maayong panglawas ug dili mataptan sa COVID-19 tungod sa pagpabaya sa uban.

Nagpasabot kini nga kun walay balaod o ordinansa nga kinahanglang ipatuman, magpatuyang lang unya ang mga tawong maghari-hari ug magpabadlong ug mabutang ang tanan sa peligro.

Busa, sugod karong Agosto 16, kinahanglang magmatngon na ang tanan ilabi na kadtong mga magsige gihapon og gawas-gawas ug kadtong wala mosunod sa minimum health standards sama sa pagsuot og facemask ug wala magdala og quarantine pass ug uban pa.