Aron ma-feel nga estudyante

Daw wala nay makapugong, moarangkada na gyud ang pagbukas sa klase sa Augsto 24 apan ang tanan mosubay na sa kabag-ohan, kalit man ug wala makapangandam gikinahanglan nga mosabay ang tanan aron dili mabiyaan sa natad sa edukasyon. Sa blended learning adunay kapilian ang mga tinun-an sama sa modular ug online or virtual classes depende kon unsay haum ug makaya sa mga tinon-an.

Dili sama sa modular nga ang mga modules ipadala lang sa balay sa mga tinun-an, ang virtual classes susama ra sa classroom setting nga naay magtutudlo ug mga tinon-an nga direktang maka communicate gamit ang tekonolohiya.

Bisan og anaa ra sa balay ang mga tinon-an ug ang magtutudlo gikinahanglan nga ibutang sa hunahuna sa matag usa nga nitambong gyud sa regular nga klase diin gikinahanglan nga himoon ang naandan nga pag atiman sa kaaugalingon sama sa grooming lakip na ang sinul-oban.

Tungod kay naa ra sa balay ang mga tinun-an basin masobrahan ra sa ka "at home" nga bisan og wala pay panghimuta sa mata molingkod lang diretso ug moatubang sa computer aron motambong klase, ang uban  basin magdala pa og plato kay magkaon samtang naminaw sa magtutudlo.

Unta dili kini mahitabo kay angayan nga hatagan og dignidad sa mga tinun-an mismo ang ilang kaugalingon aron meaningful o makahuloganon ang iyang pagtuon.

Busa angayan lang nga mamostura usab ang mga estudyante, kong pwed mag uniporme aron feel gyud kaayo nga estudyante siya sa ingon mosalig siya sa bag-ong sestema nga iyang nasinati. Gawas pa, kong mag desente ang tinun-an makaangkon kini og respeto itandi sa wala magtagad sa ilang kaugalingon nga dako kaayo ang posibilidad nga ma-bully ang kadtong mga tinon-an nga magpataka lang og sul-ob sa ilang mga bisti.

Delikado kay mahimo ra nga i-screen shot siya ug ipakatap sa social media nga makamugna na hinoon og damage sa kompayansa sa mga estudyante. Dili man seguro sobra nga ipatuman sa DepEd ang pagsol-ob og uniform kay mao man usab kini ang naandan ug maisip nga simbolo sa edukasyon.

Mas maayo gani hinoon mag uniforme kay dili kalas og mga senina nga labhan kay bahik balik man nga isul-ob.

Basta ang pagsul-ob sa estudyante og uniporme angayan lang aron mabatyagan niini nga estudyante diay siya.