Ayaw dayon pagtoo

Tambag nako sa akong mga friends nga ayaw gyud dayon mo pagtuo kon makabasa mo’g kunohay balita, kon dili “credible news source” ang nagpahibawo niini. Ayaw dayon ninyo i-share ang mao nga mga way klaro nga inpormasyon kay makahatag kini og kaguliyang sa publiko.

Karong panahona, daghan kaayo ang mga tawo nga way lingaw, ug gusto lang mohimo’g pamaagi nga magkaguliyang ang katawhan, kay mahadlok sa gipagawas nila nga kunohay balita, apan diay dili tinuod ug gituyo ra aron sa pagpanghadlok.

Sayonan ka nga gigamit pa ang logo sa usa ka pamantalaan aron kunohay mahimong katuohan ang baliya nga gusto nilang isabwag? Gipahibawo niini nga sugod kagahapon, Agosto 12, hangtud sa Agosto 31, gibalik na kuno sa ECQ ang Dakbayan sa Sugbo.

Pagkakita nako niini, nakaingon dayon ko nga “fake news” ni kay si Presidente Duterte mipahibalo nga ang pagdeklarar og GCQ sa siyudad, hangtud pa kini sa Agosto 15, kon karong Sabado. Wa gyud mahitabo nga ang presidente mohimo’g kausaban sa deklarasyon sa wa pa ang deadline.

Busa, himoa kadto nga leksyon ug ayaw dayon pagtoo kon may mabasahan kamo nga mga kunohay balita, apan gikan sa mga tawo nga dili kasaligan ug dili angay’ng tuohan.

* * *

Ang mga sakop sa PNP-Special Action Force (SAF) hatagan ni Mayor Edgardo Labella og pasidungog atol sa ika-84 nga pagsaulog sa Charter Day sa Dakbayan sa Sugbo karong Pebrero 24 sunod tuig.

Daku kaayo ang pagpasalamat ni Mayor Labella sa mga sakop sa SAF nga mitabang pagpatuman sa mga lagda sa quarantine dinhi sa atong dakbayan, ug tungod niini usa kini sa hinungdan nga mius-os ang mga kaso sa Coronavirus Disease.

Dihang mibiya na dinhi sa dakbayan sa Sugbo ang mga sakop sa SAF, gibati na og kawili kadtong mga tawo nga nangasuko sa SAF kaniadto kay kuno estrikto kaayong mipatuman sa quarantine rules.

Nakasabot na sila nga ang mga sakop sa SAF igo ra gyud diay nga nagtuman sa kamandoan nga gihatag ngadto kanila.

* * *

Ang tinuod, bisan og dili pa tingali si Mayor Labella maoy nagdumala sa dakbayan sa Sugbo, unya miigo ang COVID-19, makasinati gihapon kita og dakong problema.

Tungod man gud kay pwerteng daghana nga mga tawo nga moanhi sa dakbayan, nga maoy sentro sa negosyo. Hunahunaa ra gud, ang Sugbo gilibotan sa daghan kaayong mga pantalan nga anha modunggo ang mga tawo nga gikan sa lainlaing probinsya.

Naa ba gud niini ang Baguio City? Mao nga nagkatawa ko nga ang mayor sa Baguio mianhi kay motudlo kuno og mga pamaagi unsaon pagpakunhod ang problema sa coronavirus . Pastilan.

Buyno, nalipay diay ko kay bag-o na ang City Health Officer nato nga si Dr. Jeffrey Ibones.