Way kinutoban nga kasaypanan
ARANGKADA - Leo Lastimosa (Banat) - August 12, 2020 - 12:00am

Nia na ta sa ikapitong buwan sa pandemiya apan ang Department of Health (DOH) padayon nga nagkayamukat sa pagtaho niini sa inadlaw nga mga numero ug ubang kalamboan sa nasudnong kampanya batok sa COVID-19.

Nipasalig nga tarungon nang ilang sistema apan hangtod karong semanaha nitumaw gihapon ang makauuwaw nilang kasaypanan.

Human sa nihit nga kasayoran sa pasiunang mga kaso, gipasigarbo nilang sistema nga mohatag sa labing lab-as nga kasayuran apan human giusab-usab sa makadaghang higayon bahaw ug makalibog gihapon ang mga numero ug ilang katin-awan nakapasamot lang sa mga pagduda.

* * *

Gipatumoy sa inadlawng taho sa DOH ang pino nga mga letra nga kon imong lentehan mabantang nga lista diay sa kasaypanan:

Niadtong Domingo, Agosto 9, may 78 ka recoveries nga nadoble og lista ug 20 ka recoveries nga nangamatay diay; ug

Niadtong Lunes, Agosto 10, kaduha nalista ang 143 ka recoveries ug usa ka patay ug unom ka recoveries ang nasuta nga patay diayng upat ug masakiton pang duha.

* * *

Nitaho ang DOH 7 niadtong Lunes, Agosto 10, nga 768 ka swab tests ang nahimo, wa rang katunga sa 1,980 ka tests niadtong Domingo, Agosto 9.

Gawas nga way katin-awan sa dakong pagtidlom sa gidaghanon sa tests, may kahibulongan nga nisiwil.

Sa siyam ka molecular laboratories sa Sugbo ug Bohol, lima ray nitaho sa DOH 7 sa gidaghanon ug sangpotanan sa ilang tests.

Usa sa upat nga wa motaho og bisan usa ka test mao ang Cebu Doctors University Hospital (CDUH). Apan sa listahan sa 48 nga  nagpositibo, gipahibawo sa DOH 7 nga may duha nga nag-positibo sa CDUH.

* * *

Mahimong way malisya ang mga nalista sa ibabaw ug ubang kasaypanan. Mahimong tungod sa pagsulbong sa mga kaso nagduka ang encoders o nasipyat ug natuk-an ang sistema, nga maoy gibasol sa DOH nga hinungdan nganong nalangay na sab ang ilang taho niadtong Lunes.

Mapasaylo natong kasaypanan sa unang mga adlaw sa pandemiya nga way nakaandam sa kapaspas ug kalapad sa tinakdanay.

Sa ikapitong buwan, makiangayon lang nga maningil nang katawhan og mas tukma ug mas hingpit nga kasayuran.

Kon wa magkadimao hangtod karon, may sukaranan nang pagduda nga tinuyo. O di gyod kamao.

* * *

leo_lastimosa@abs-cbn.com

DOH
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with