Si Teddy Locsin Jr.

Dunay panahom si Teddy Locsin Jr. Matud pa niya and I quote:

“Let’s blame God for it. He created the virus in the bat and made sure it was transmissible to humans. Why did He even make bats?

Do you know bats smell awful because hanging upside down, they pee on themselves? Who makes stuff like that? God hasn’t explained. God talaga.”

Ania ang akong pamalandong.

1. Ang tawo mahimong mobasol ni bisan kinsa kun una, kun ang tawo wala pa makahamtong sa iyang panghunahuna.

Ang maong panahom dili pinasikad sa rason hinunoa pinasikad sa reaksiyon tingali agig sanong sa komentaryo nga pinasikad sa bisan unsang naobserbahan nila nga mihukngay kaniya ug sa iyang mga kaubanan.

2.  Ikaduha, ang maong panahom mahimong defense mechanism sa pagtago sa iyang kaugalingong vulnerability mao nga iyang basulon ang uban bisan gani ang Dios sa iyang kaugalingong kapakyasan.

3. Ikatulo, bisan pa man kun ang usa ka tawo moingon nga atheist dili mahitabo nga ma-deny niya ang Dios sanglit dili nimo mahimong i-deny nga anaa sa imong hunahuna.

Ang maong pagbugalbugal nga gihimo nagpadayag lamang sa iyang naghinobrang bilib sa kaugalingon.

Sa iyang pagtuo makahimo siya bisan sa iyang kaugalingong gahum lamang. Ug kadaghanan ning maong pundok diin siya sakop buot motago sa ilang kakuwangan pinaagi sa ilang mga aroganteng baroganan.

Ang maong pagka arogante pamasin nga makuha nila ang pagtahud sa katawhang Pilipinhon, apan ang pagtahud dili mapugos hinunoa kinahanglang imo kining anihon pinaagi sa maayong sanglitanan ug dili sa walay hinungdang pasiatab.

Nahinumdom nuon ko nga may rekomendasyon pud si Secretary Año alang sa mga magtiayon nga human sa ilang panagdulog himoon dayon ang social distancing sa mga bana ug asawa nga gikapoy tawon sa limbationg panagtambayayong sa karaang ritwal sa gugma.

Tingali bugtong paagi sa pagpapas sa mapait nga kasinatian sa adlawan pa. Nanlimbasog nga dunay ikapakaon sa pamilya.

Tingali mahimong hero si Napoleon Bonaparte kun mobangon siya sa lubnganan aron tukoron pag-usab ang mga guillotine ug unahon ang mga mapahimuslanon ug mga maluibong mga pinili sa katawhan aron unta manalipod ug dili mohatag og mga panahom nga ambot kun diin gikan…. usa kini ka dakong urom?

Tingali higayon na aron himoon nato ang kalabasa ingon nga pagkaon sa tanan nitawag kanatong bugo o gahi ba nuon og ulo.

Si Goko kuyog sa iyang kaaway nga si Majimbo nangita og hawan kaayo nga dapit aron sila magsangka, way laing misantop sa akong hunahuna kondili ang hawan ug halapad nga bato sa kawalay kapaingnan; basin sa unahan mobathay ang diyotay nga kahayag sa paglaum.  Ug ang Dios nga giyam-iran sa iyang mga binuhat padayon gihapong mopadayag sa iyang gahum sa hustong panahon.

Ug unta karong tuiga magpabilin pa unta kang buhi ug himsog. Kay basin malisud alang kanimo igsuon ang 2021.