NCR angay’ng mangopya sa Sugbo
Ang nahitabo sa Sugbo ug Central Visayas ang labing lig-ong argumento nga mosukwahi sa pangangkon sa Malakanyang nga ang mas daghang swab testing maoy nakapaburot sa mga kaso sa COVID-19 sa Pilipinas nga nalabwan nang Indonesia nga ilang gipasanginlan nga daginuton ang testing.
Segun sa opisyal nga mga numero sa Department of Health Central Visayas (DOH 7) samtang nidaghan ang swab testing sa walo ka laboratoryo sa nangaging mga adlaw nitidlom ang gidaghanon sa bag-ong mga kaso sa Sugbo ug labi na sa mga silingan nga Bohol ug Negros Oriental.
* * *
Ang kasinatian sa atong rehiyon maoy mohimakak sa binuang nga pangangkon, nga gikopya lang ni Presidential Spokesperson Harry Roque gikan ni US President Donald Trump, nga ang pagsulbong sa mga kaso nanukad sa mas agresibo nga swab testing.
Ang pait nga kamatuoran, nga kinahanglang angkunon nilang Presidente Rodrigo Duterte ug kaubanan aron mapangitaan dayon og sulbad, mao nga lapad ug paspas ang tinakdanay sa Metro Manila ug kasilinganang mga rehiyon ug igo lang nakit-an sa testing ang mas daghang kaso. Sa ato pa, angayng dugangan, di ibanan, ang testing.
* * *
Bisan upat ra sa walo ka molecular laboratories sa Central Visayas ang nakataho sa DOH 7 niadtong Domingo, Agosto 9, padayong nisaka ang gidaghanon sa swab testing ngadto sa 1,980. Wa nang kaabot og gatos, 97 na lay nakaplagan nga positibo.
Mao ni nakapatidlom sa positivity rate (gidaghanon sa nag-positibo kon itandi sa tanang gisumiter nga swab samples) niadtong Agosto 9 ngadto na lang sa 4.9%. Nga angayng panig-ingnan sa ubang bahin sa nasud.
* * *
Segun sa World Health Organization (WHO) dunay duha ka maayong implikasyon ang positivity rate nga 5% paubos: Igo nang gidaghanon sa swab testing ug nasugdan na sa pagkontrolar ang tinakdanay.
Timaan nga kuwang pa ang swab testing ug wa ma pa mabaraw ang tinakdanay sa kaulohan mao ang padayon nilang pag-isa sa nasudnong positivity rate ngadto sa 12.6%.
Gani, matod sa DOH, kinatas-an ang positivity rate sa National Capital Region (NCR) nga nisulbong ngadto sa 17.3% (kay 17,831 ang nag-positibo sa 102,934 ka swab samples) sa semana sa Agosto 2 hangtod sa Agosto 8 ning tuiga.
* * *
- Latest
