Bunga sa paningkamot

Sigun sa balita nga natala sa pamantalaang The Freeman sa miaging semana, nakatala na lamang ang dakbayan sa Sugbo og 701 ka kaso sa COVID-19 sulod sa 14 ka adlaw. Gani may adlaw pa nga wala nay natala nga nagpositibo sa makamatay nga virus ang dakbayan sa Sugbo.

Kun sa nangaging mga buwan nag three digits ang mga nagpositibo sa COVID-19 sa dakbayan sa Sugbo, karon nag-two digits na lang ug gani aduna pay adlaw nga wala na gayod. Mao pod kini ang atong nakita sa dakbayan sa Mandaue ug Lapu-Lapu.

Nagbunga na ang pagpaningkamot sa tri-cities nga gilangkuban sa Sugbo, Mandaue ug Lapu-Lapu uban sa dako nga suporta sa buhatan sa Office of the Presidential Assistant for the Visayas ( OPAV ) nga gipangulohan ni Secretary Mike Dino.

Kun makahinumdom pa mo sa dihang nagkataas ang kaso sa COVID-19 sa sayong bahin sa buwan sa Pebrero gitigom ug gihiusa ni Secretary Mike Dino sila si Mayor Edgardo Labella, Jonas Cortes ug Jonard “Ahong” Chan sa siyudad sa Sugbo, Mandaue ug Lapu-Lapu alang sa pagpakigbatok sa maong balatian.

Pinaagi sa pagpakigtambayayong sa pribadong sektor, Department of Health ug Regional Inter-Agency Task Force for the Management of Emerging Infectious Diseases ang OPAV ug tri-cities, nahimong agresibo sa pagkumbati sa mananakod ug mikuyanap nga makamatay nga virus.

Dinhi nakita ang suliran sa kakuwang sa testing capacity sa Sugbo ug tibuok Kabisayaan gawas pa sa nagkuwang nga mga medical equipment ug supplies sama sa medical face masks ug mga personal protective equipment.

Kay kuwang sa kagamitan, ang Christina Lee Dino Foundation midonar og tulo ka RT-PCR machines diin ang duha niini gihatag sa Sub-National Laboratory sa Vicente Sotto Memorial Medical Center ug ang usa gihatag sa Eastern Visayas Regional Medical Center nga laboratoryo sa rehiyon 8.

Ang OPAV miayuda usab og 50,000 ka test kits, PPEs ug mga higdaanan alang sa Sugbo.