Taming batok sa virus

Gikan sa mandatory wearing of face mask, ang pagsul-ob na sab sa face shield ang gikatakdang ipatuman sa Department of Transportation DOTr sugod sa Agosto 15 sa mga pampublikong sakyanan.

Unsa na pud ang sunod sa face shield, dili kaha PPE na pud? Mao ni ang mga pangutana ilabi na kadtong mga pilosopo kinsa hilig kaayo motan-aw sa negatibong aspeto kay lagi hasol kuno kaayo.

Tinuod hasol gyud bisan gani magsul-ob kita og facemask hasol naman gani kaayo kay gawas nga dili kaayo ta kaginhawa init pa gyud sa paminaw. Samot na kon sapawan pa kini og face shield nga mura na gyud seguro ta malumos kay gamay naman lang ang hangin nga hanggabon.

Gawas sa kahasol, dugang gasto na usab kuno kay mopalit naman sad og face shield nga mahal ang presyo.

Kung kini atong paundayonan sa pagtan-aw, magsakit gyud ang atong dughan apan kong balihon nato sa pagtan-aw ang kasegurohan nga mahatag niini sa atong kinabuhi angayan kita mobati og kaluwasan gikan sa pagtakboy sa virus.

Sa akong bahin, dili nako igsapayan ang kahasol sa mga pangsul-obon nato nga taming batok sa kagaw kay mao kini ang maghatag nako og kalinaw sa panghunahuna kay nasayod ako nga luwas ako sa virus kay dili man kini makasulod tungod sa mga shield nga akong gisul-ob.

Sa presyo, nagkabarato naman karon ang face shield tungod sa daghang kompetensiya ug kong ampingan lang  molungtad kini og dugay.

Ato lang i-disinfect  human og gamit mahimo nang sul-obon pagbalik.

Dili nato igsapayan ang presyo niini kay simbako lang mataptan sa kagaw hilabihan ra ba gyud ka dako ang bayronon sa hospital.

Mas palabihon nalang nga maglisod og ginhawa tungod sa mask ug face shield kay sa mag labor breathing o dili na kaginhawa tungod sa virus nga gikinahanglan pa nga i-intubate kon magkalisod.

Kinahanglan buksan nato ang panghunahuna sa mga lagda nga alang ra sa atong kaayohan.