EDITORYAL - Face shield vs COVID-19

Gimando na sa Inter-Agency Task Force ang paghimong mandatory sa pagsuot og face shield isip proteksyon batok sa novel coronavirus disease.

Una niini, gimando nang daan ang pagpasuot kanunay og facemask kun ang mga tawo mogawas sa ilang balay para gihapon proteksyon.

Karon doblehon na, facemask ug face shield.

Apan si Cebu City Mayor Edgardo Labella miingon nga tun-an pa kun ipatuman sab dinhi  ang pagpasuot og face shield.

Sakto kining gibuhat sa mayor kay mahatagan og panahon ang mga tawo aron makapalit niini.

Ikaduha, maayo unta og dunay libreng ihatag ang gobiyerno o ang mga manakop kun duna silay masakpang wa magsuot og face shields. Duna ba?

Sa pikas bahin, dugang gastos na sab kini sa gobiyerno alang sa mga frontliners nga makig-atubang sa mga pasyente. Kay lahi rapud og dili nila isyuhan og ingon niini ang mga front liners sa gobiyerno.

Milyones ka pesos na sab sa pundo sa gobiyerno ang gikinahanglan pagpalit niini para sa tanang frontliners.

Nakita sa IATF  nga dili pa gyud paigo ang social distancing, facemask, ug stay home policy batok sa COVID-19 tungod kay hangtud karon padayon ang pagsaka sa mga kaso ilabi na sa National Capital Region.

Posible kaayo kay daghan gihapon  wala mag–amping ug nagpabaya nasab ang mga barangay officials pagptuman sa mga health protocols.

Pagkatinuod,  dugang gastos lang kini sa mga tawo karong panahon nga daghang nawad-an og panginabuhian tungod sa pandemiya.

Apan kun ipamugos gyud kini sa IATF, kinahanglang libre nila kining ihatag tungod kay mahal man kini para sa uban.

Gani duna may mga tawong way ilis-ilis sa ilang gisuot nga facemask kay way ikapalit, unsa nalang kun pasapawan pa og face shield.

Proteksyon mao gyuy unang panagang batok sa COVID-19, apan samtang wa pa higpit gipatuman dinhi sa siyudad, kadtong may ikapalit, mas maayong managana nalang daan.

Kay mas maayong dunay giandam apan wa kinahanglana, nungka sa gikinahanglan apan wala ka kapangandam.