Bantayanang mga numero sa COVID-19
Ahat pa ang bisan unsang pangangkon sa kadaogan sa Sugbo sa kampanya batok sa COVID-19.
Samtang nihinay ang pagkatap sa kagaw sa nangaging mga adlaw, kay mas gamay ang bag-ong mga kaso kay sa nangaging mga semana, mahimong mosulbong pagbalik sama sa nahitabo sa Metro Manila ug sa ubang kanasuran nga gipakaingon sa kadaghanan nga nakakontrolar na sa pandemiya.
Ang mga numero nga gipagawas sa Department of Health (DOH) matag adlaw makapalili nato hain mahimutang ang kampanya apan mag-usab-usab agad sa nagkalainlaing lakang nga gihimo o wa himoa sa gobyerno.
* * *
Ang gidaghanon sa bag-ong mga kaso mag-agad sa gidaghanon sa nakuhang swab samples, nga mag-agad sab sa ka-agresibo sa pagsubay sa tanang nakaduol ug posibleng natakdan sa mga nangasakit sa COVID-19.
Ang gidaghanon sa bag-ong mga kaso mag-agad pila ka swab samples ang masusi sa mga laboratoryo, kansang kapasidad mag-agad sa gidaghanon sa health workers, makina, test kits, reagents ug ubang kahimanan.
Ang mga numero nga ipagawas matag adlaw mag-agad sab sa kapaspas sa local government units (LGUs) pagsumiter sa swab samples ug sa DOH pag-encode ug pagpagawas sa kasayoran.
* * *
Mag-usab-usab sang positivity rate (pilay positibo sa gisusing swab samples), nga segun sa World Health Organization kinahanglang moabot og 5% paubos una makapangangkon nga igo nang swab testing ug nakontrolar nang tinakdanay, kay mag-agad sab sa nalista sa ibabaw.
Ang kahinangop sa pagtidlom sa positivity rate niadtong Agosto 6 ngadto sa 4.9% (92 ang positibo sa 1,873 ka samples) gipulihan dayon og kahingawa dihang nisulbong ngadto sa 8.4% niadtong Agosto 7 (137 ang positibo sa 1,622 ka samples).
* * *
Makapabalaka sang pagsaka sa case fatality rate (CFR) sa COVID-19 (pilay nangamatay sa tanang natakdan) sa Dakbayan sa Sugbo. Nasubay ni kanhi Cebu City Administrator Nigel Paul Villarete sa inadlawng taho sa DOH nga nisaka ang CFR gikan sa 1.08% niadtong Hunyo 15, ngadto sa 2.89% niadtong Hunyo 26, dayon 4.91% niadtong Hulyo 10 ug 6.28% niadtong Agosto 7.
Ang CFR mag-agad sa kalidad sa mga tambalanan, gidaghanon, pangedaron ug kahimsog sa mga pasyente ug, nakatag-an ka, sa kalapad sa swab testing ug contact tracing.
* * *
- Latest
