Challenge accepted

AGOSTO 9, 2020: Ikanapulog-siyam nga Domingo sulod sa tuig

Mga Pagbasa: 1 Har. 19;9a11-13a/Sal. 85/Rom. 9;1-5/Mt. 14;22-33

Kini ang nigawas nga pamahayag ug pasalig ni Jesus ngadto kang Simon Pedro sa dihang nibati og tumang kalisang ang iyang mga tinun-an.

Si Pedro nga naneguro niingon man nga kun ikaw ka na palakta ko nganha nimo. Tuod man gitugotan siya apan pagkakita niya sa dakong mga balod nisugod siya pagkaunlod.

Ang atong Ginoo nagkanayon man, pagkadiyotay sa inyong pagtuo! Diha diha nibanos ang kalinaw!

Ning panahon nato karon, daw sama kita sa mga tinun-an nga naglisod og paggaod sa atong sakayan. Ang mga balod sa pagsulay sama ning pandemiya, ang nagkahunlak nga ekonomiya, kagubot tungod sa way padulngan mga laraw, pagkatun-as sa moralidad ingon man ang mga korupsiyon nga nakaapekto dako uyamot labina sa mga ubos ug mga kabos.

Ang malupigong sistema sa katilingban padayong miut-ot kanato sa hilabihan.

Challenge accepted dili lang tingali sa dakong tinguha nga mo-survive kun magpakabuhi kondili aron mohimo og pagsupak sa mga binuhatang walay ayo ning atong nasud.

Resistance is our obligation labina kun nahimong garapal na kaayo ang tanan alang kanato. Mismo sa atong atubangan nahimo man kitang gibinuangan. Imbis makatabang nakapasamot naman nuon sa atong kahimtang. Dili ba bukid kini alang kanato?

Dili ba makapalumos man kini kanato? Malumos gyud kita kun mahanaw na ang pagtuo nato ngadto sa mga tawo nga atong gituohan nga maoy manalipod sa atong katungod ug mohatag sa atong mga panginahanglan.

Kay sila mismo mao man ang niunay nilawgaw sa atong kalinaw tungod sa mga langyaw.

Nitungas ang Ginoo ngadto sa bukid nga nag-inusara aron mag-ampo.

Ang maong pag-ampo ug paghilom magdapit unta kanato nga panahon ning dakong kagahob sa kaway kapaingnan dili lang paigo ang  pagpakahilom aron moluhod sa mga nagpaka dios dios dinhi sa yuta.

Kinahanglang human sa pagpakahilom ang mga lakang ipahimugso aron mamahimong mabuhi ang tanan dili tungod sa kalooy sa pipila nga anaa sa gahum nga maoy magbuot sa atong ugma kondili aron mabuhi ang tanan segun sa balaod sa gugma ug panaghiusa.

Hinaut pa unta! Challenge accepted mga higala nga mamahimo kitang inspirasyon sa uban ning panahon sa dakong katalagman.