Takna sa pagpanudya

Nunot sa nag-alintabong kasuko sa Presidente Duterte nga nakaaghat kaniya pagtukod ug task force nga moimbestigar sa mga anomaliya sa PhilHealth, nakapamulong si Spokesperson Harry Roque nga ikalipay niya pag-ayo ang pag-anunsyo sa mga masuspenso ug mapalagpot sa katungdanan gikan sa maong ahensya.

Labaw ang kalipay sa katawhan kon adunay kawatan sa gobyerno nga mataral ug masilotan.  Kon moabot kanang adlawa, makaawit gayod ang tanan sa alawiton sa simbahan nga nagkanayon, “Adlaw kini’ng ginama sa Diyos, magsadya ang tanan”.  Hinaut pa unta!

Small time ra’y masilotan

Buot sa Liberal Party sa nasud sa Honduras nga modagan pagka-presidente ang konbiktado nga “drug money launderer” nga si Yani Rosenthal sa eleksyon karon tuig 2021.  Baniog na ang pagkalambigit sa mga politiko sa Honduras sa mga drug cartels/traffickers didto.

Susama ra usab dinhi sa Pilipinas diin kon kwarta na gani ang mamulong, ang tanan maminaw gayod.  Husto ang gisulti ni Aesop nga “Bitayon nato ang mga gagmay kawatan, apan itudlo o pilion nato ngadto sa dagkong posisyon sa kagamhanan kadtong mga mangtas ug banggiitan”.  Baya no!

Bakuna ug disiplina

Gituohan ni US infectious disease expert, Dr. Anthony Fauci, nga ang naaprobahan nga bakuna batok sa COVID-19 mahimong 50%-60% lamang ang pagka-epektibo.  Busa kinahanglan gihapon nga motuman ang katawhan sa mga health protocols aron kapugngan ang pagkuyanap sa pandemic.   Bisan diay kon magkinabuhi na kita ubos sa bag-ong normal, dili gihapon mausab ang paagi sa pagbatok sa coronavirus.  Bakuna ug disiplina gihapon ang yawe alang sa maayo ug hapsay nga pagkinabuhi taliwala sa pandemic.  Laban lang!

Higala kita sa tanan

Matud pa ni Spokesperson Harry Roque, ang kamandoan sa Presidente sa dili pagsalmot sa “joint maritime drills” sa South China Sea nahasubay sa gisagop nga “independent foreign policy” ug gitumong sa paglikay sa tensiyon tali sa ubang nasud.

Dugang pa ni Roque nga ubos sa maong polisiya nga gisagop sa Presidente, higala ang Pilipinas ngadto sa tanan.  Matud pa bitaw sa Dalai Lama, “Nabuntog ko ang akong mga kaaway kon nahimo ko sila’ng mga higala”.  Mao ba diay!

Simbahan o shopping mall?

Malipayon nga mipahibawo si Mayor Edgar Labella nga giaprobahan ang iyang apelasyon ngadto sa IATF nga tugtan ang mga simbahan nga mopasulod og 10% sa kapasidad niini atol sa mga relihiyosong kalihukan.

Alang sa Mayor, kon gitugtan ang tawo pagsulod sa mga shopping malls, walay rason nga dili sila tugtan pagsulod sa simbahan.

Sa hataas nga panahon, walay trabaho ug daghan na ang bakanteng oras ang tawo. Sa maong pagtugot sa IATF, daw namulong na ang Diyos ngadto sa tawo, “Luag na man ang imong panahon, mahimo ba nga kita na usab ang mag-estoryahanay?”.  Unsay imong tubag?