EDITORYAL - Managlahing interes

Gimando ni Pres. Duterte sa Armed Forces of the Philippines ilabi na sa Philippine Navy nga dili moapil sa military exercise nga gihimo sa Amerika ug mga kaalyadong mga nasud diha sa South China Sea.

Makasabot ta sa gihimo sa presidente nga sa eksplinasyon pa ni Defense Secretary Delfin Lorenzana, naglikay lang ang presidente nga dudahan sa China ang Pilipinas sa pag-apil sa exercise ug usa pa lahi ang interes sa Pilipinas ug sa interes sa US ug mga kaalyadong nisalmot.

Ang naval exercise nga gipangunahan sa duha ka US aircraft carriers sa Amerika, Australia, ug gipaabot nga salmotan sab sa Japan ug India  makapasurok gyud sa dugo sa China.

Ang maong naval exercise pamaagi kini sa US ug mga kaalyadong nasud nga ipanawong sa China nga di ila ang SCS, sukwahi sa ilang imahinasyon.

Ang China miangkon ug naghimo gyud og mapa gamit ilang imahinasyon nga ilaha ang tibuok South China Sea.

Kun buot hunahunaon pabor kaayo sa Pilipinas kun mosakay kini sa panahon, kaning military exercise sa SCS kun moapil ang  Pilipinas makapataas kini sa moral sa mga Pilipino.

Apan wala kini buhata ni Duterte kinsa una nang miangkong “inutil” kini batok sa China bahin sa West Philippine Sea. Si Duterte hangtud karon padayong nangindahay nga hatagan sa China sa mga gisaad kaniyang mga imprastraktura nga maoy iyang gilaumang  mopalambo sa Pilipinas.

Apan duha nalang ka tuig ang nahibilin sa iyang termino wala pa gyud kini natuman sa China.

Karon naabtan nalang  sa pandemiya gikan sa China, prayoridad na niya karon ang gisaad na sab sa China nga hinabang batok sa maong sakit.

Bahala og dili maayo tan-awon sa mga mata sa ubang mga nasud ang Pilipinas basta dili lang masuko kaniya ang China. Di pa tingali karon.

Samtang gipakita ni Duterte sa China nga siya kasaligan, ang pangutana kun kasaligan ba ang China.