EDITORYAL - Kontrobersiya sa PhilHealth

Makapahiubos kaayo kining mga alegasyon batok sa mga opisyales sa Philippine Insurance Corporation (PhilHealth) nga P15 bilyones sa pundo niini ang nawala tungod sa pagpangilad o sa laktod kurapsyon.

Ang pasangil seryuso kaayo nga ang Senado naghimo og imbestigasyon kabahin niini. Mismo kanhi opisyal sa maong ahensiya ang nibutyag niini atubangan sa mga senador nga dunay mafia sa mga opisyales nga  nalambigit sa maong mga anomalya.

Maayong imbestigahon kini og maayo, tungod kay kwarta sa katawhan ang pundo niini ug dili makapalipay sa katawhan ang mga balitang nawagtang ang maong pundo ug nameligro pang mabangkarota ang ahensiya.

Makapabalaka tungod kay kun ingon niini ang sitwasyon, asa naman lang mokuha og kwarrta ang mga tawo nga walay ikasarang para sa pagpatambal sa ilang sakit. Samot na nga dunay balitang pipila ka tuig gikan karon mahubas na ang pundo sa maong ahensiya.

Ang PhilHealth mao lamang ang bugtong gisaligan sa mga kabus nga Pilipino aron makapatambal sa ilang mga balatian.

Ang pangutana, gawas sa mga sakop sa giingong mafia sa sulod sa PhiliHealth, kinsa pa man nga sakop sa gobiyerno ang nalambigit niini?

Dili kini mosanay ang anomalya kun way nalambigit nga gikan sa gawas sa PhilHealth.

Maayong subayon sab kining mga tambalanan nga naghimo og mga claims para sa mga pasyenteng nalandig sa ilaha ug gisawo sa PhilHealth ang pipila sa balayrunon niini. Ang claims usa sa mga paagi nga mogawas ang pundo sa ahensiya, ug dili mahalata ang pagpagawas sa pundo kay may rason man, apan ang pangutana kun ang claim mao ba gyud ang serbisyong nahatag ngadto sa pasyente.

Siguradong adunay mga kakunsabong mga tambalanan kining  giingong mafia ug usa sa maayong apilon sa pagtan-aw kining mga report nga bisan dili novel coronavirus ang sakit, ipabutang gyud nga mao kini sa rason nga sila ray nasayod.

Kun may kamatuoran ang maong mga estorya, taas-taas nga imbestigasyon ang kinahanglang himuon, kay kun dili magngisi lang ang mga  nakabulsa sa kwarta samtang nagkalisod ang katawhang Pilipino sa pandemiya.