Kadalan ang pinuy-anan

Higpit kaayo ang health protocol sa dakbayan sa Sugbo aron masanta gyud ang pagkuyanap sa coronavirus kon COVID-19 ug kamatuoran niini ang pagpanakop sa mga otoridad sa mga tawong manggawas sa ilang mga pinuy-anan.

Matag adlaw daghan ang madakpan nga pangdad-on sa Plaza Independencia tungod sa mga quarantine violations sama sa walay quarantine pass ug walay facemask.

Apan taliwala pa niini anaa gihapoy mga tawo nga anaa karon sa daplin sa kadalanan nagpuyo sama nalang sa downtown area dapit sa dakong university diin nahimutang ang mga gitawag nga tawong walay pinuy-anan.

Gani ang usa ka media outfit nga duol sa naasoyng sidewalk mipadayag og reklamo sa kasaba sa mga tawong nagpuyo sa aseras tungod kay magsaba saba man panahon sa kagabhion kay mag-inom man sila og bino.

Gawas pa wala usab magsul-ob og mask ang naasoyng mga tawo nga samot makapabalaka sa mga tawo usab nga haduol sa dapit kay simbako lang kong dunay covid ang usa kanila aw sure gyud nga makatakod.  Giadto nako ang dapit ug nakita gyud nako ang miserableng kahimtang nila nga nagsalig nalang sa tabang sa mga tawo nga malooy kanila, kong walay mohatag ikatulog nalang kuno nila ang ilang kagutom.

Mamasura sila apan wala usab kunoy mopalit busa mamarking  pero wala man say mga sakyanan karon busa antos gyud sila sa kalisdanan.

Samtang nakig estorya ko sa usa kanila, nakugang ko sa iyang giingon nga kong makatigom sila sa mga kwarta nga madawat sa mga tawo nga nagpakabana ipalit man pud nila og bino nga ilang kalingawan kada gabii kay palabay kuno sa kalaay.

Pastilan makadismaya nga makahubog hubog pa diay sila sa kalisod nga ilang nasinati, inay maluoy maglagot na hinuon ta sa ilang kalaki, gawas pa wala mauso ang pagsul-ob nila og facemask. Sa dapit nga ilang nahimutangan nagsagol ang mga sakto og paminsar ug kadtong mga tawong wala na sa ilang kaugalingon o mga taong grasa nga dayag kaayo makita sa pusod sa syudad. Unsa man ang kalainan nila sa ubang mga tawo nga nanggawas sa mga balay ug gipangsikop, nganong gipasagdan man sila sa dapit nga ilang nahimutangan.

Sa panahon karon delikado kaayo, wala na gani silay facemask, mag inom pa gyud simbako kon mataptan sila sa COVID-19 dako kaayong kahigayonan nga makatakod sila sa uban kay daghang mga tawo ang mangagi dihang dapita.

Kong naay balay nga mogawas dakpon, apan kon wala kay balay nga naa ka sa gawas pasagdan nalang? Hinuon basin wala pa sila mataymingi sa mga otoridad.

Kong pagsikopon sila asa man pud sila ibutang? Ang dakbayan ra gyud ang makatubag ani.