Wala makat-on

Sulod sa tulo ka adlaw human gipakanaug sa general community quarantine ang dakbayan sa Sugbo, moabot sa hapit duha ka libo ang mga nadakpan tungod sa paglapas sa health protocols nga gipatuman sa lokal nga kagamhanan sa dakbayan sa Sugbo.

Tungod niini, giklaro ni Mayor Edgardo Labella nga pabiling gamiton ang mga quarantine pass bisan ubos na sa GCQ ang dakbayan sa Sugbo hangtod nga aduna pay mga malapason sa gipatuman nga health protocols.

Gipasabot ni Mayor Labella nga adunay gahum ang mga lokal nga kagamhanan sa pagpatuman og estrikto nga mga lagda sa health protocols alang sa pagseguro nga dili mograbi pagbalik ang pagkatap sa coronavirus disease-19.

Giklaro sa mayor nga ang gihimo sa iyang kagamhanan gitumong dili aron lisud-lisoron ang mga Sugboanon kun dili aron sila kapanalipdan batok sa COVID-19.

Una niini giingon ni Department of Interior and Local Government Secretary Eduardo Año nga wala na kinahanglana ang quarantine pass panahon sa GCQ.

Ambot unsaon nato paghulagway ang dul-an duha ka libo ka mga tawo nga nadakpan tungod sa paglapas sa health protocols nga gipatuman sa dakbayan sa Sugbo. Maingon ba nato nga wala ni sila makakat-on o dili lang gyod ni sila gusto nga makat-on. O ba kaha kun atong tinambanon sa pagsabot mga gahi lang gyod ni sila og mga ulo ug masinupakon.

Ngano ba pod nga masinupakon man sila? Tungod ba kay mao na gyod ni ang ilang pagkatawo o tungod ba kaha kay natakdan lang sila sa nakita sa ilang palibot.

Kining mga nadakpan naghatag lang og dugang sakit sa ulo sa mga frontliners ug mga opisyal sa gobyerno. Ang nakapait, walay adlaw sa dakbayan sa Sugbo nga walay madakpan nga masinupakon sa health protocols. Ambot lang.