Kuwang gihapong swab testing
Di na ang Dakbayan sa Sugbo ang epicenter sa Covid-19 sa Pilipinas. Sa opisyal nga ihap sa Department of Health (DOH) sa kinatibuk-ang mga kaso hangtod niadtong Martes, Agosto 4, ikaduha na lang ang Dakbayan sa Sugbo sa kinadaghanan og kaso ug mao na lay bugtong dapit sa Sugbo nga naapil sa listahan sa napu ka dakbayan nga kinadaghanan og kaso.
Ang unang dapit ug ang ikatulo hangtod sa ika-napu gidominahan sa mga dakbayan sa Metro Manila nga sa niaging pila ka semana maoy gigikanan sa kinadaghanan sa bag-ong mga kaso.
* * *
Ang Dakbayan sa Quezon na maoy kinadaghanan og kaso sa Covid-19, niabot na og 9,805, nga labaw na og 682 sa Dakbayan sa Sugbo nga may 9,123. Ikatulo sa listahan ang Dakbayan sa Manila (6,555), ikaupat ang Dakbayan sa Makati (2,995) ug ikalima ang Dakbayan sa Taguig (2,962).
Ika-unom ang Dakbayan sa Caloocan (2,919), ikapito ang Dakbayan sa Paranaque (2,422), ikawalo ang Dakbayan sa Pasig (2,296), ikasiyam ang Dakbayan sa Pasay (2,150) ug ikanapu ang Dakbayan sa Mandaluyong (2,033).
* * *
Ang Dakbayan sa Mandaue, nga mao na karoy ikaduhang kinadaghanan og kaso sa Sugbo ug Central Visayas, mao ang ika-11 nga dakbayan nga kinadaghanan og kaso sa tibuok nasud (2,015) ug ang Dakbayan sa Lapulapu ang ika-12 nga may 1,907 ka kaso.
Nagsunod sa listahan ang laing upat ka dakbayan sa Metro Manila: Ika-13 ang Navotas (1,834); ika-14 ang Malabon (1,667); ika-15 ang Muntinlupa (1,627); ug ika-16 ang Valenzuela (1,477).
* * *
Makapabalaka hinuon ang kakuwang sa swab testing sa Sugbo, Metro Manila ug ubang bahin sa nasud, nga nakapatumaw sa pagduda nga ang ihap sa DOH naglangkob lang og 10% sa aktuwal nga mga kaso nga wa pa matultoli.
Niadtong Agosto 4, gibutyag sa DOH nga nakahimo og 1,179 ang upat sa unom ka laboratoryo sa Sugbo (mas gamay sa gipasalig nga 6,000 ka tests matag adlaw nga kapasidad); ug 24,743 ka tests ang 72 sa 89 ka laboratoryo sa tibuok nasud (kuwang sa 30,000 ka tests matag adlaw nga maoy target niadto pang Mayo).
* * *
- Latest
