“Mafia sa PhilHealth"

Nabulgar atol sa imbistigasyon sa Senado ang garapal nga pangurakot sa  pondo sa PhilHealth. Basi sa pamahayag sa mga whistleblowers nga sila si Thorrsson Montes Keith, ang miresign nga anti-fraud officer sa PhilHealth, ug sa miyembro sa board nga si Alejandro Cabading gibana-banang mokabat sa P15 bilyones ang nabulsa sa gihulagway nga "mafia sa PhilHealth."

Kun tuohan ang ilang testimoniya, daw sa tanang paagi sa pangurakot gihimo sa mga opisyal sa PhilHealth uban sa pagpakigkonsabo sa mga doktor ug tambalanan.

Wala pay labot niini ang pagpaburot sa presyo sa ilang mga transaksiyon. Pananglitan ang labihan ka mahal nga mga computer sets nga gipalit sa ahensiya.

Taliwa sa kontrobersiyal nga mga kasayuran nga mitumaw atol sa imbistigasyon didto sa Senado, labing minus duha ka mga membro sa PhilHealth dinhi sa dakbayan sa Sugbo ang nangreklamo tungod sa tinunto sa maong ahensiya. Ang ilang reklamo nagmatuod unsa ka lapad ang operasyon sa "mafia" diha sa maong ahensiya. Nakugang sila si Claire Cabalda ug Merlita Galvez human sila makadawat og pahibawo pinaagi sa text gikan sa PhilHealth.

Sigun sa notisya ang ahensiya mibayad sa kantidad nga P5,450 sa matag-usa ka pasyente isip hospitalization benefits ngadto sa Vicente Sotto Memorial Medical Center. Ang text nagpakita nga si Cabalda naadmit sa VSMMC niadtong Abril 16  samtang ang anak ni Galvez niadtong Abril 15 bisan kun wala sila masakit.

Basi sa ilang post diha sa Facebook, ang duha midemanda og pagpasabot sa PhilHealth nganong nibayad og benepisyo ngadto sa VSMMC nga wala may admission nga nahitabo.

Sigun ni Galvez ang PhilHealth, dihang iyang gitawgan, mipasabot nga ang maong benepisyo alang kuno sa gipahigayon nga PCR test. Pero dili ba nga libre man ang maong test sa gobyerno? Kun bayad kadto sa PCR test, nganong gipagawas sa ilang record nga dunay admission nga nahitabo?

Pila pa kaha ka mga membro sa PhilHealth ang ingon niini ang kasinatian? Kun ingon niini ka kwestiyonable ang mga transaksiyon sa maong ahensiya, dili imposible ang pasidaan ni PhilHealth acting senior vice president Nerissa Santiago nga posibling sunod tuig bangkarota na ang maong ahensiya.

Si Santiago miangkon atubangan sa Senado niadtong Martes nga hayan mabangkarota ang ilang ahensiya sunod tuig kun way dugang pundo nga ihatag ang gobyerno tungod kuno sa epekto sa pandemya.

Sigun niya P90 bilyones ilang alkansi karong tuiga tungod sa COVID-19 ug gipaabot nga P147 bilyones ang mamahimo nilang alkansi sunod tuig kun magpadayon ang krisis. Apan kun imong subayon ang ilang mga transaksiyon mura'g ang ahensiya mabangkarota apan dunay mga opisyal niini nga nabilyonaryo.

Unsay mahitabo sa pagpatuman sa Universal Health Care  Law nga maghatag og libreng hospitalization benefits sa tanang Pilipino og ang ahensiya nga gitugyanan sa pagpatuman niini paingon na nga mabangkarota?

Mahimo nalang ba sab kaha kini nga usa sa mga saad ni Presidente Duterte nga way katumanan?