Anomaliya sa PhilHealth

Taliwala sa nadiskobrehan nga halapad nga giingo’ng anomaliya sa PhilHealth, diin gibana-bana nga mokabat sa 15 bilyones ka pesos nga pundo sa ahensya ang nahanaw tungod sa mga anomaloso nga transaksyon, miangkon si PhilHealth Acting Senior Vice President Nerissa Santiago nga mahimong mabangkaruta ang ahensya sunod tuig. Sukwahi sa coronavirus, dili matawag nga natural nga katalagman ang kurapsyon.  Apan ni’ng gipahigayon nga imbestigasyon sa Senado sa PhilHealth, dili lang tingale maglaum ang katawhan nga adunay masilotan. Kay lage ginaingon man, nga “wala’y huwes nga mokonbikto sa iyang kaugalingon”.  Faeetz!

SAF pahawaon, sap pabalikon

Gikataho nga ang mga sakop sa Special Action Force (SAF) nga gi-deploy sa dakbayan sa Sugbo sugod niadtong Hunyo 2020, mobiya na sa dakbayan sugod karo’ng Agosto 15, 2020. Sama sa iyang sangay nga Social Amelioration Program (SAP), nakasinati usab og kontrobersiya ang pagpakatap sa SAF sa dakbayan.  Sama sa pagkahanaw sa SAP, inig abot sa Agosto 15, mahanaw usab ang SAF taliwala sa pagmaya sa katawhan. Apan sukwahi sa SAF, gipaabot ug gihandom sa katawhan nga mobalik ang SAP.  Baya no!

Way monopoliya sa kaalam

Human mapublikar ang giingon nga “komedya” nga awhag sa Presidente sa paggamit sa gasolina isip disinfectant, mipahimangno gilayon ang usa ka registered chemist nga si Alvin Gallardo nga ang paggamit sa gasoline mahimong makadaut sa lawas. Walay tawo nga nag-inusara pagpanag-iya sa kahibalo.  Kay ginaingon nga, “Ang KAHIBALO (knowledge) nagtudlo kanimo pag-ila nga ang kamatis usa ka prutas; apan ang KAALAM (wisdom) nagtudlo kanimo sa dili pagbutang sa kamatis diha sa fruit stand”.  Madahaan!

 China: Higala o kaaway?

Human mipadayag si Presidente Duterte sa iyang pagsalig nga aduna na’y bakuna karong tuiga, mipasidaan ang usa ka think-tank group nga Pinoy Aksyon nga dili lang mosalig pag-ayo ngadto sa China sa atong panginahanglan sa bakuna batok sa COVID-19.  Nunot kini sa kasayuran nga daghan ang mga peke nga produkto gikan sa China. Haom sa pasidaan ang panultihon nga “Ayaw kahadloki ang kaaway nga moasdang kanimo; kahadloki ang dili matuod nga higala nga migakos kanimo”.  Ang asin ug asukal usahay managsama baya ang hitsura. Isip-isip!

 Shame and fame campaign

Miawhag si Deputy Speaker Dan Fernandez sa IATF ug sa National Task Force against COVID-19 nga molunsad og “shame and fame campaign” isip kabahin sa mga lakang pagbatok sa coronavirus.  Ubos sa maong kampanya, pagatawgon nga “bayanihan” kadtong mga naayo sa COVID nga moboluntaryo pagpaila sa ilang kaugalingon; ug pagatawgon usab nga “maytamayin” kadtong mo-discriminate sa mga COVID patients.  Nahubsan na ba ang atong mga magbabalaod sa maayong ideya?  Mora’g tinuod man tingale ang obserbasyon nga nag-atubang kita ug duha ka pandemic: ang coronavirus ug ang pagkahanggaw (stupidity). Pagkatoytoy!