EDITORYAL - Libud-suroy panahon sa pandemiya

Samtang nagmingaw ang kadalanan sa Dakbayan sa Sugbo tungod aning lockdowns ug liboan ka Sugboanon ang nangatanggong sa ilang tagsatagsa ka mga panimalay, daw way nakamatikod aning daghang mga libud-suroy nga mura lang og wala maapektahi.

Diha lang sa eskina sa Colon ug D.Jakosalem sa karaang building adunay dul-an 20 ka mga libud-suroy nga sukad pa niadtong Marso hangtud ning mga panahona ang nangligdas lang diha sa sidewalks.

Walay nasayod kun taga diin sila ug nganong napunta sila sa maong dapit tungod kay sa wala pa ang COVID-19 pandemic ug wala pa ning lockdowns wala man sila sa maong lugar kaniadto, ang uban  kanila mga edaran na ug duna say mga bata.

Wala man sab silay panginabuhian ug labaw sa tanan, peligro kaayo silang mataptan sa maong sakit ilabi na ang mga edaran ug mga bata. Way klaro kun asa sila gikan sa ilang pagkaon ug tubig mainom, mas labaw nga makapabalaka kun duna unya masakit kanila.

Ang barangay San Nicolas miatiman na og kapin 300 ka mga libud-suroy sukad sa pagsugod sa lockdowns. Hinuon wala sila magdugay didto kay namiya ra pagbutang sa siyudad sa general community quarantine.

Namalik sila sa pagbalik sa siyudad sa enhanced community quarantine (ECQ) ug nagdala pa og laing kauban, apil mga bata.

Salamat sa pagpakabana sa barangay ug sa Archdiocesan Shrine of San Nicolas de Tolentino Parish kay bisan pa ning pandemiya natabangan kining mga tawhana. Gani daghan kanila ang gibunyagan pinaagi ni Msgr. Roger Fuentes pagkasayod nga wala pa sila makadawat sa maong Sakramento. Matud pa sa report, ang City Department of Social Welfare and Services (DSWS) nag-profiling na kanila, apan kutob lang ba dinhi?

Apan bisan unsaon pa sa barangay ug sa parokya pagpaningkamot pagpakaon ug pagpasilong kanila lisud kaayo kini buhaton hangtud sa hangtud.

Maayo unta og bisan temporaryong kapasilongan, work for food program, ug paglaum nga matabangan silang makauli sa ilang tagsa-tagsa ka probinsya mahatag sa siyudad.