Pagdumili pag-angkon sa problema
Ang pasalig ni Health Secretary Francisco Duque III nga iyang paminawon ang pakitabang sa health workers nga gipangapoy ug nataptan na sa kagaw ug ang saad sa Malakanyang nga tukion ang ilang mga sugyot sa sunod nga tigom sa Inter-Agency Task Force (IATF) batok sa Covid-19 maoy mga timaan nga di diay tinuod ang pangangkon sa mga tagduma sa kampanya batok sa pandemya nga ilang gikonsulta ang mga eksperto ug ang mga nag-atiman sa mga pasyente.
Gisalikway na sa Malakanyang ang sugyot sa mga doktor nga ibalik pagpaubos sa enhanced community quarantine (ECQ) ang Metro Manila sa way pagtubag sa ilang gitumbok nga mga buslot sa kampanya.
* * *
Ang paghulagway sa Philippine College of Physicians (PCP) nga napuno nang mga tambalanan, natakdan sa Covid-19 ang dugang health workers nga nisangpot sa pagtak-op sa pipila ka tambalanan, nang-resign nang ilang kaubanan tungod sa kabalakang mangamatay ug nangaluya nang mga nahibilin nisukwahi sa pasalig sa Malakanyang nga kontrolado nilang sitwasyon.
Ang masulub-on nga kahimtang nga gibutyag sa health workers hagbay rang gitiyabaw sa mga pasyente ug sa ilang mga tagtungod apan padayon ug igo lang nga gibungul-bungolan sa mga opisyal sa lokal ug nasudnong kagamhanan.
* * *
Kadaghan na luwati apan padayong gisalikway sa Malakanyang ang mga rekomendasyon sa PCP ug dul-an sa 70 ka kahugpongan sa mga doktor nga naglakip sa Philippine Medical Association, Philippine Pediatric Society Inc., Philippine Society for Microbiology and Infectious Diseases Inc., Philippine Heart Association, Philippine College of Chest Physicians, Philippine College of Geriatric Medicine ug Philippine Society of Public Health Physicians:
Pagpalapad sa swab testing inay sa di kasaligang rapid testing;
Higpit nga pagpatuman sa mga lagda sa isolation ug contact tracing nga gilaktawan sa local government units (LGUs);
Pagpalambo sa mga sakyanang pamasahero; ug
Pagtabang sa mga kabos nga gipanggutom sa lockdown.
* * *
Ang awhag sa health workers nga nadungan sa pag-ulbo sa kapin sa 12,000 ka bag-ong kaso sa Covid-19 sa niaging tulo ka adlaw nakapabantang sa makalilisang nga hulagway nga way klarong plano pagbadlong sa pandemya.
Nakapait mao nga di silang kasugod pagsulbad kay nagdumili ang Malakanyang pag-angkon sa problema. Nalukop hinuon og panulisok. Ug nagwarawara sa wa pa mamugnang bakuna.
* * *
- Latest
