Maayong performance sa dakbayan sa Sugbo

Milukso na usab ang dakbayan sa Sugbo paubos sa general community quarantine (GCQ) human sa duha ka semana nga pagkailalum niini sa mas estrikto nga modified enhanced community quarantine (MECQ).

Gumikan niini, makaginhawa na ang lokal nga ekonomiya tungod kay partial nga mangabli ang ubang mga establisimento human usab sa pipila ka semana nga pagkasira gumikan sa lagda batok sa coronavirus disease o COVID-19.

Hinuon, sa nangaging mga semana samtang gipaubos pa kini sa higpit nga quarantine protocol, mas mikusog ang kampanya sa dakbayan batok sa COVID-19. Kini gumikan usab sa kooperasyon sa kinabag-an nga nahipos gayud sulod sa ilang panimalay.

Resulta kini sa maayong pagdumala sa Inter-Agency Task Force on the Management of Infectious Diseases (IATFMID) nga nakatutok gayud sa Sugbo tungod sa nagsaka nga kaso sa coronavirus disease dinhi sa nakalabay’ng mga semana. Gani, wala makaikyas sa panan-aw sa mga kadagkoan sa national government ang milampos nga mga estratehiya nga gigamit sa dakbayan sa Sugbo batok sa coronavirus disease sa nangaging duha ka semana.

Matud pang Presidential Spokesman Harry Roque ug ubang opisyal sa kagamhanan nga dili layo ang posibilidad nga sundon didto sa kaulohan ug ubang lugar ang mga estratehiya nga gigamit dinhi sa Sugbo batok sa COVID-19.

Hinaut nga padayon ang maayong performance sa dakbayan sa Sugbo sa kampanya batok sa makamatay nga COVID-19. Kini aron sa ingon mapildi gayud sa katapusan ang maong balatian nga mipatay na’g gatusan ka libo sa kalibotan.

Ang angay lamang nato nga buhaton mao ang relihiyosong pagsunod sa mga lagda nga gipatuman sa otoridad batok sa coronavirus. Dako akong pangagpas nga sa sunod nga mga semana, mas moubos pa ang community quarantine status sa dakbayan.