Padayon ang pagluok sa PUJs
Karong gipaubos na sa general community quarantine (GCQ) ang Dakbayan sa Sugbo, gipaabot nga madugangan ang pasiunang 14 ka rota nga gitugot sa naandan nga public utility jeepneys (PUJs). Ang pasalig nadawat sa PUJ drivers ug operators sa niagi pang semana.
Apan hangtod sa akong pagsuwat ini, padayon silang gipasapasa sa mga tagduma sa Land Transportation Frachising and Regulatory Board (LTFRB) ug Land Transportation Office (LTO) ug sa lokal nga mga opisyal. Wa pay klaro kanus-a sila makabalik sa pagpamasahero human sa upat ka buwan nang pagkasukamod sa ilang panginabuhi.
* * *
Human gipahibawo sa Kapitolyo sa Sugbo nga gitugotan nang karaan nga PUJs nga mamasahero, naglumba dayon ang pipila ka PUJ operators sa pag-adto sa rehiyonal nga buhatan sa LTFRB aron nga makasugod na paghikay sa mga dokumento ug ubang mga panginahanglan.
Apan gipapaabot sila og pila ka takna una giingnan nga wa pa diay maandam ang mga lagda ug busa mas maayo nga mobalik sa ilang mga kooperatiba aron nga matingob ang pag-andam ang mga panginahanglan samtang giumol pa ang mga lagda sa LTFRB, sa LTO ug sa Kapitolyo.
* * *
Natuman na sa mayoriya sa PUJ operators ug drivers ang panginahanglan nga gipahamtang sa Department of Transportation (DOTr) nga magtukod sila og mga kooperatiba.
Ang kuwang na lang mao ang pagsusi sa roadworthiness sa ilang PUJ units ug kon nabutangan na ba sa physical barriers aron pagtino nga di magsikit og lingkod ug di magtinakdanay ang mga pasahero. Apan bisan giunsa nila og hangyo wa magdali ang LTO sa pag-inspeksiyon sa ilang mga sakyanan.
* * *
Wa nang kahibawo ang PUJ drivers ug operators asa sila dangop aron nga makapamasahero ug makatarung na sa pagpakaon sa mga sakop sa ilang pamilya. Wa katabang sa ilang kawsa ang mga taho sa media nga napahimutang na sila.
Angayng hinumdoman sa media nga di katabang sa tanang hingtungdan kon, tungod sa kalibotanong hulga sa COVID-19, magyangu-yango lang sila bisan unsay isulti sa mga tagduma sa mga buhatan sa kagamhanan.
Angayng susihon unsa katinuod ang mga pangangkon. Kay usa ka tibuok kalibotan ang kalainan tali sa saad sa pagtukod og taytayan ug sa aktuwal nga pagpatuman sa proyekto.
* * *
- Latest
