Karon nga nag-GCQ na kita

So, GCQ  na usab kita. This is welcome development. Apan wala kini magpasabot nga wala na ang pandemic. Atong ipadayon ang pag-amping ug pag-ampo, kay nagpadayon usab ang hulga sa makalilisang nga kagaw.

Gani, kon buot hunahunaon, tungod kay mas daghan  nang mga tawo ang manggawas gikan sa mga panimalay, gikinahanglan ang mas istrikto nga pagpatuman sa mga health protocols.

Sa ato nang gibalikbalik dinhi, dili pa kita angayan nga mo-relax ug magpaluag sa atong bakus. Ipadayon ang pag-disiplina sa atong kaugalingon.

Ug labaw sa tanan, let’s cooperate. Kay alang kini sa kaayohan natong tanan. Atong i-set aside for a while ang mga personal natong intereses. Atong i-consider ang intereses usab sa uban. Dili kay ang ato rang kaugalingon ang atong gihunahuna.

Maayo unta nga kadtong magpabadlong, sila ra ang matakdan sa sakit. Apan, mahitabo gud, manakod man sila sa uban. Busa, dako’g kadaut ang ilang mahimo, gumikan sa ilang pagpasagad ug pagpabadlong.

So, niining atong pagka-GCQ, magmatngon na kitang tanan, ug ato na gyud tinud-on ang pagtuman sa mga health protocols. Lisud ba gud ni?

* * *

Niay akong i-reprint dinhi kining giingon ni Amb. Babe Romualdez sa iyang lindog sa Philippine Star giulohan “Humanity Unites Us. “ Relevant gihapon kini hangtud karong mga panahona.

Matud niya, usa sa atong nakat-unan gikan sa coronavirus  pandemic mao kining atong  pag-angkon ug pagka-amgo nga ang kinabuhi lumalabay lamang.

Unsa man kunoy atong giisip nga labing mahinungdanon nga kinahanglan atong maangkon? Kwarta? Gahom? Kadungganan? Influensiya? Ug kon sa higayon nga hulgaon na kita sa kamatayon, ang money, power, fame, ug influence, nga atong gipaningkamotan, becomes irrelevant and immaterial. So, kining nahitabo karon sa atong nasud nakapa-humble ug nakapa-unite natong tanan.

Dugang ni Babe: “This vicious virus does not make distinctions on whether you are rich, poor, ordinary or powerful. As a matter of fact, it can even wipe you out financially.” So, kining virus nga nakahimo na’g dli tiaw nga kadaut sa atong panglawas ug nakakalas na’g daghang kinabuhi, dili mag-agad sa kahimtang pinansiyal sa buot takboyan niini, kabus o adunahan, gamhanan ug dungganan o huyang ug yanong lungsoranon.

So, tapus niining tanang kaguliyang, magpabilin kitang magpaubsanon ug mapahiusahon alang sa tingusbawan natong tanan.

Dugang niini, ang pandemic nakahimo baya’g daghang kausaban sa atong kaugalingon. Matud pa, nakapabuotan natong tanan, ug alang sa uban, nakapabalik kanila ngadto sa sabakan sa Ginoo.

Alang pa gayud sa uban, kining nahitabo kanato karon, nakapa-realize kanila nga ang tawo is both body and soul, diin sa unang mga panahon, ang alang lamang sa lawas ang atong gisingkamotan, ug ang alang lamang sa kahilayan niini ang giatiman.

Gumikan sa pandemic, daghan kanato karon ang nagmaampuon na, nga sa unang mga panahon wala makatultol asa ang simbahan.

Karon, nga sirado na hinuon ang mga simbahan, daghan kanato ang nakakat-on na sa pag-ampo pinaagi sa pag-rosaryo ug pagsimba sa mga online nga Santos nga Misa.

Atong kutloon pag-usab si Romualdez: “This vicious virus does not make distinctions on whether you are rich, poor, ordinary or powerful. As a matter of fact, it can even wipe you out financially.”