Gipul-an na sa COVID-19
RENBOR PATROL - Rene U. Borromeo (Banat) - July 28, 2020 - 12:00am

Napul-an na ko nga mokuha og mga “updates” sa Coronavirus Disease kay akong giisip nga nagka wa nay lami samtang nagkadugay na ang maong sakit.

Tingali, bisan kamo napul-an na nga maminaw sa mga balita kabahin sa coronavirus. Gani, sa akong programa sa radyo, adto na nako isibya dapit sa katapusan ang mga statistics sa COVID-19.

Unya, pananglit maapiki na sa oras kay daghan pa ko og isyu nga gihisgotan, dili na nako apilon ang paghisgot sa coronavirus. Bisan ang akong mga tigpaminaw miingon nga gipul-an na sila nga mamati niini.

Sayonan ka nga Marso pa nga nagsige ta og sibya kabahin sa coronavirus. Halos kada gabii sa akong programa, mag-una gyud ang kalamboan sa COVID-19. Nagkadugay, wa nay lami ang maong isyu.

Sigurado sab ko nga ang kadagkoan sa kagamhanan, gipul-an na paggasto pagsige’g hatag og tabang sa katawhan, ilabi na nga hapit na mahurot ang kuwarta sa kagamhanan.

Dinhi sa Dakbayan sa Sugbo, dili kay minilyon ka pesos lang ang gasto kabahin sa pagpanghatag og bugas sa mga apektadong pamilya ug ubang panginahanglanon pag-responde sa COVID-19.

Bana-bana nako miabot na tingali sa P4 bilyones ang nagasto sa siyudad, ilabi na nga giingong dunay pag-overprice sa ubang mga gipalit nga mga canned goods.

Para nako, malipay na ko nga karong Agosto 1, ideklarar na unta sa Inter-Agency Task Force (IATF) nga General Community Quarantine (GCQ) ang siyudad sa Sugbo.

Luoy na kaayo ang katawhan nga wa nay kuwarta, way bugas, ug way makaon tungod kay wana na silay trabaho. Ang mga negosyante usab nakasinati og grabeng alkanse.

Daghang mga tag-iya og mga negosyo nga bisan sirado sila, apan gitabangan nila ang ilang mga empliyado aron nga dili mangamatay sa kagutom.

Angay’ng hunahunaon sa mga opisyal sa kagamhanan nga bisan og nanghatag sila og tag 25 kilos nga apan makasustiner ba gud na? Ibutang nato nga gikan niadtong Marso hangtud karon, 50 kilos ang nahatag sa City Hall ngadto sa mga lumolupyo.

Ang mga barangay, nakahatag usab og tag 10 ka kilong bugas ug pipila ka canned goods, apan paigo ba gud na nga konsumo sa usa ka pamilya sulod sa lima ka buwan?

Usahay maghinuktok ko kay gihunahuna nako ang mga PUJ driver, mga drayber sa habal-habal, mga taxi driver, mga ordinaryong kawani, kon unsa na tawon ang ilang gikaon?

Unya, ang mga gigutom na tawon nga mga tawo, pangdakpon usab kon mogawas sila sa ilang kabalayan aron nga mangita og pamaagi aron sila makakaon.

Busa kitang katawhan, motabang ta aron dili mokuyanap pagsamot ang COVID-19 pinaagi sa pagsul-ob og mask kon mogawas, ug likayi ang pakigdikit sa dili nimo mga kaila.

COVID-19
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with